1983-yilda Namangan shahrida tug‘ilgan Ma’ruf Niyazov 2016—2017-yillarda o‘g‘rilik bilan shug‘ullanganligi sababli unga nisbatan sud tomonidan qidiruv e’lon qilingandi. Uning qidiruvdagi faoliyati uzoqqa cho‘zilmadi. Bu haqda Oliy sud matbuot xizmati ma’lum qildi.
U jinoiy sheriklari Muhammadjon va Tohir bilan oldindan til biriktirib, 2016-yil 13-noyabr kuni Chimboy tuman dehqon bozori yaqinida bekatda turgan Nexia rusumli mashinaning eshigini qaychi bilan ochib, yukxonasida turgan 8,8 million so‘mni o‘g‘irlagan.
Bundan tashqari, Ma’ruf jinoiy sheriklari bilan birgalikda 2016-yil 29-noyabr kuni Hazorasp tumaniga kelib, Sanoat qishlog‘ida joylashgan guruch bozorining avtoturargohida turgan Nexia va Lacetti rusumli avtomobillarning yukxonasidan 11 million so‘mni gumdon qilgan.
2017-yil 9-yanvar kuni Nukus shahrining “Ko‘hna qal’a” hududida joylashgan avtoturargohdagi Spark eshigini qaychi bilan ochib, salonda turgan 20 million so‘mni olib qochgan.
Mazkur jinoiy harakatlar uchun Muhammadjon va Tohirlarga nisbatan 2017-yilda sud hukmi e’lon qilinib, ularga ozodlikdan mahrum qilish jazosi tayinlangan. Ma’ruf esa jazodan qutilish maqsadida xorij davlatlarining birida yashiringan.
U 2018-yil 11-noyabr kuni Rossiyaning Orenburg shahrida ushlangan.
Sud hukmi bilan M.Niyazovga JKning 169-moddasi 3-qismi “a” bandi bilan 3 yil muddatga ozodlikdan mahrum etish jazosi tayinlandi.
Izoh (0)