Andijon shahar ko‘p tarmoqli markaziy poliklinikasi hududidagi Andijon viloyati “Issiqlik manbai” aksiyadorlik jamiyatiga qarashli isitish qozonining portlashi natijasida yuz bergan favqulodda holat oqibatida 18 nafar o‘quvchi yengil va o‘rta darajada tan jarohati olgan. Jurnalist Umidjon Mamarasulov jabrlanuvchi o‘quvchilarning holati va voqea qanday yuz berganini o‘rganishga harakat qildi.
“Bo‘limimiz markaziy poliklinikaning orqa tomonida joylashgan. Kirish faqat bir tomonlama. Xonamda o‘tirganimda gumburlagan ovoz eshitildi. Tashqariga chiqqanimda oynalar singan, tibbiy ko‘rikdan o‘tayotgan bolalar cho‘chib ketganini ko‘rdim. Hamkasblarim bilan birga ularga birinchi tez tibbiy yordamni ko‘rsatishga harakat qildik. Jarohat olganlarni, umuman barcha bemorlarni shoshilinch tibbiy yordam mashinasida respublika shoshilinch tez yordam ilmiy markazi Andijon filialiga yubordik”, — deydi poliklinika ftiziatriya bo‘limi mudiri Dilshodbek Halilov.
O‘quvchilardan biri Ruqiya Abduhalimova portlash kuchi uni uchirib yuborganini aytdi.
“Dugonalarim bilan ichkarida navbatda turgan edik. Shifokorlar shovqin qilmasligimizni iltimos qilishganidan so‘ng tashqariga chiqdik. Shunda kotyoldan tutun chiqayotgandek bo‘ldi. E’tibor bermadik. Pillapoyadan tushganimizdan 2–3 daqiqa keyin birdaniga portlash yuz berdi. Bizni uchirib yubordi, bir-ikki joyimiz shilindi. Qo‘rqib ketdik. Hozir ahvolimiz yaxshi”, — deya voqeani so‘zlab berdi Ruqiya Abduhalimova.
“Bolalar bilan tashqarida gaplashib turgandik, — deydi Nurillo Abdumannopov. — Birdan baland ovoz eshitilib, hammayoq tutunga to‘lib ketdi. Yerga yiqildim. Qo‘rquvdan ichkariga kirmoqchi bo‘lib, pillapoyadan chiqishga harakat qildim. Orqamdan shisha siniqlari ham uchib kelgandek bo‘ldi. Lekin qo‘limdan boshqa yerga shikast yetmadi”.
Andijon shahar tibbiyot birlashmasi boshlig‘i Tohir Zokirovning ma’lum qilishicha, nafaqat o‘quvchilar, balki voqea joyida bo‘lgan shifokorlar ham qo‘rqib ketgan. Poliklinikaga tashrif buyurgan bir necha kishiga psixologik yordam ko‘rsatilgan.
“Hodisa 26-fevral kuni soat 10:26 larda poliklinikaning ftiziatriya bo‘limi joylashgan hududda yuz bergan, — deydi Andijon shahar tibbiyot birlashmasi boshlig‘i Tohir Zokirov. — Bu yerda belgilangan reja-jadval asosida shahar xalq ta’limi bo‘limi tasarrufidagi 4-umumta’lim maktabining 9-“G” sinf o‘quvchilari flyuografiya tekshiruvidan o‘tayotgan bo‘lgan. Baxtsiz hodisa tufayli 18 nafar o‘quvchi turli darajadagi tan jarohatlari olgan. Xizmat ko‘rsatayotgan shifokorlarning ikki nafari qo‘rqib ketgan. Ularning holati ham yaxshi. Bundan tashqari poliklinikada bo‘lgan yana 10 nafar qo‘shimcha murojaat qilganga qabulxonada ambulator – psixologik yordam ko‘rsatilgan. Ayni paytda tegishli tashkilotlar tomonidan tekshiruv, surishtiruv ishlari davom etmoqda”.
Portlash oqibatida jarohat olgan ikki nafar bemor operatsiya qilingan.
“Bugun soat 11:00 lar chamasida bizning markazimizga markaziy poliklinikada yuz bergan hodisa natijasida 7 nafar bemor tibbiy tez yordam mashinasida, yana 11 nafari shaxsiy mashinalar orqali olib kelingan. Bemorlarning uch nafari o‘rta darajada tan jarohati olgan. Holati tekshirilib neyroreanimatsiya bo‘limiga yotqizilgan. Shulardan ikkitasida biri oyoq qismidan, ikkinchisi yelka qismidagi jarohati borligi uchun jarrohlik amaliyoti o‘tqazildi. Qolgan 14 nafarining tan jarohati yengil, aksariyat bolalar qo‘rquv natijasida kelgan. Birinchi tibbiy yordam ko‘rsatilgan. Hozirda neyrotravmatologiya bo‘limiga gospitalizatsiya qilganmiz. Bemorlarning barchasi shifokorlarning doimiy nazoratida, belgilangan tartibda davo muolajalari qilinmoqda”, — deydi Respublika shoshilinchi tez yordam ilmiy markazi viloyat filiali bosh vrachi Azizbek Mamadiyev.
Izoh (0)