1983 йилда Наманган шаҳрида туғилган Маъруф Ниязов 2016—2017 йилларда ўғрилик билан шуғулланганлиги сабабли унга нисбатан суд томонидан қидирув эълон қилинганди. Унинг қидирувдаги фаолияти узоққа чўзилмади. Бу ҳақда Олий суд матбуот хизмати маълум қилди.
У жиноий шериклари Муҳаммаджон ва Тоҳир билан олдиндан тил бириктириб, 2016 йил 13 ноябрь куни Чимбой туман деҳқон бозори яқинида бекатда турган Nexia русумли машинанинг эшигини қайчи билан очиб, юкхонасида турган 8,8 миллион сўмни ўғирлаган.
Бундан ташқари, Маъруф жиноий шериклари билан биргаликда 2016 йил 29 ноябрь куни Ҳазорасп туманига келиб, Саноат қишлоғида жойлашган гуруч бозорининг автотураргоҳида турган Nexia ва Lacetti русумли автомобилларнинг юкхонасидан 11 миллион сўмни гумдон қилган.
2017 йил 9 январь куни Нукус шаҳрининг «Кўҳна қалъа» ҳудудида жойлашган автотураргоҳдаги Spark эшигини қайчи билан очиб, салонда турган 20 миллион сўмни олиб қочган.
Мазкур жиноий ҳаракатлар учун Муҳаммаджон ва Тоҳирларга нисбатан 2017 йилда суд ҳукми эълон қилиниб, уларга озодликдан маҳрум қилиш жазоси тайинланган. Маъруф эса жазодан қутилиш мақсадида хориж давлатларининг бирида яширинган.
У 2018 йил 11 ноябрь куни Россиянинг Оренбург шаҳрида ушланган.
Суд ҳукми билан М.Ниязовга ЖКнинг 169-моддаси 3-қисми «а» банди билан 3 йил муддатга озодликдан маҳрум этиш жазоси тайинланди.
Изоҳ (0)