Azar Agueroga, Sarri esa yana Gvardiolaga qarshi. Angliya Liga Kubogi kimga nasib qiladi? (prevyu)

Bugun, 24-fevral sanasida Angliyada 2018/19-yilgi futbol mavsumining ilk sovrini egasi ma’lum bo‘ladi. Angliya Liga Kubogi final bellashuvida Mauritsio Sarri boshchiligidagi “Chelsi” klubi Xosep Gvardiola boshliq “Manchester Siti” bilan kurash olib boradi. Quyida mazkur uchrashuvga oid ma’lumotlar va qiziqarli faktlar taqdim etiladi.

“Uembli” stadionida o‘tadigan Angliya Liga Kubogi finali ikkala jamoaning tarixga o‘zaro 161-uchrashuvi sifatida kiradi. Tarixiy statistika London klubi foydasiga. “Aristokratlar” 65 ta o‘yinda g‘alaba qozongan, 39 ta o‘yinda esa durang qayd etilgan. “Shaharliklar” bo‘lsa 56 ta o‘yinda g‘alaba nashidasini surgan. To‘plar nisbati ham “Chelsi” tomonni ko‘rsatmoqda —  220-206. Tomonlar joriy mavsum hisobidan 4-marta o‘zaro duch kelmoqda. Mavsum avvalida (2018-yil, 5-avgust) jamoalar Angliya Superkubogi uchun maydonga tushgandi. O‘shanda “shaharliklar” Serxio Agueroning dubli evaziga 2:0 hisobida g‘alaba qozonib, Superkubokni o‘ziniki qilgandi. 2018-yil 8-dekabrida esa “Chelsi” APL doirasida “Siti”ni Ngolo Kante va David Luislarning gollari evaziga mag‘lub etdi. 2 hafta oldin bo‘lsa, tomonlar APLning 2-davrasida o‘zaro duch keldi. Unda “Siti” “Chelsi”ni shunchaki tor-mor keltirdi — 6:1. Shunday ekan, bugungi o‘yin prinsipial ahamiyatga ekanligi sabab ham maydonda haqiqiy jang bo‘lishi kutilmoqda.

Musobaqa yo‘li

“Chelsi”

“Chelsi”ning finalga qadar yetib kelishi bir muncha qiyin bo‘ldi. Jamoa 1/16 finalda “Liverpul”ni 2:1 hisobida katta mashaqqatlar evaziga mag‘lub etgan bo‘lsa, 1/8 finalda “Derbi Kaunti” ustidan 3:2 hisobidagi g‘alaba qo‘lga kiritildi. Chorak finalda “Bornmut” minimal (1:0) hisobda taslim etildi. Yarim finalda bo‘lsa, hamshahari “Tottenhem”ni mag‘lub etib, finalga chiqdi. Sarri jamoasi musobaqa davomida 5 ta o‘yinda 4 ta g‘alabaga erishdi, bitta o‘yinda esa mag‘lub bo‘ldi. 9 ta gol urdi, 5 ta golni o‘z darvozasidan olib chiqishga majbur bo‘ldi. Londonliklarning musobaqadagi to‘purari esa Eden Azar bo‘lib turibdi — 3 ta gol.

“Manchester Siti”

“Shaharliklar” esa finalga qadar bir muncha oson yo‘l bilan yetib keldi. 1/16 finalda “Oksford Yunayted”ni 3:0 hisobida mag‘lub etildi. 1/8 final bosqichida “Fulhem” (2:0) taslim etilgan bo‘lsa, chorak finalda “Lester” (2:1) musobaqadan chiqarib yuborildi. Yarim finalda bo‘lsa, “shaharliklar” gollar shousini uyushtirdi. “Byorton” jamoasi ikki o‘yin natijasiga ko‘ra, 10:0 hisobida tor-mor keltirildi. Gvardiola shogirdlari 5 ta o‘yinda 5 ta g‘alaba qozondi. To‘plar nisbati esa 17-1. “Siti”ning musobaqadagi to‘purari Gabriel Jezus, uning hisobida 5 ta gol bor.

Qiziqarli faktlar

• “Manchester Siti”ning Liga Kubogidagi mag‘lubiyatsiz o‘yinlar seriyasi 11 ta uchrashuvga yetdi;
• “Shaharliklar” so‘nggi 14 ta rasmiy o‘yindan 13 tasida g‘alaba qozondi;
• “Siti” “Chelsi”ni so‘nggi 5 ta o‘yindan 4 tasida mag‘lub etgan;
• “Chelsi” so‘nggi 6 ta rasmiy o‘yindan 3 tasida mag‘lubiyatga uchradi;
• Sarri va Gvardiola 5 bora o‘zaro duch kelgan, ulardan 4 tasida Mauritsio jamoasi mag‘lub bo‘lgan.

O‘yindan oldingi fikrlar

Men “Sarribol” nima ekanligini bilmayman. Angliyadagi birinchi kunimda aytganimdek, hozir ham buning nima ekanligiga tushunmayman. Bu jumla qaysidir jurnaldan olingan bo‘lsa kerak. Italiyada ham bunday so‘zni hech qachon eshitmagan. Shunday ekan men hech narsani bilmayman. Hammasining yakunida eng asosiysi — natija qoladi. Har holda men shunday hisoblayman. Qachonki, jamoa natija ko‘rsata olmasa, unda tanqidlar uchun eshiklar ochiladi. Faoliyatim davomida faqatgina natijaga ehtiyojim bo‘ladi, boshqasiga emas.Mauritsio Sarri, “Chelsi” bosh murabbiyi

Sarrining “Chelsi”dagi holati, mening “Siti”dagi holatimdan farq qiladi. Angliyadagi faoliyatimning birinchi yilida klub hech qachon menga shubha bilan qaramagan. OAV esa meni 1 yoki 2 ta mag‘lubiyatdan so‘ng iste’foga ham chiqarmagan. Ba’zan vaziyat qiyinroq bo‘ladi, shunda vaqt talab etiladi. Mauritsioning APLdagi 1-mavsumida ham shunday holat kuzatilmoqda. Men Sarri va “Chelsi” haqida yuqori fikrdaman. Agar siz “Siti”—“Chelsi” (6:0) o‘yinini ko‘rib bunga ishonmasdirsiz, ammo Sarrining jamoasi ba’zi vaziyatlarda aqlbovar qilmas ishlarni qildi.

Xosep Gvardiola, “Manchester Siti” bosh murabbiyi

Taxminiy tarkiblar