Sulsher Kloppga, Pogba esa Salohga qarshi. Barchasi “Manchester Yunayted”—“Liverpul” bahsi haqida (prevyu)

Bugun, 24-fevral sanasi Angliyada katta futbol kuniga aylanadi. Boisi,  Joze Mourinyo ketgach, Ole-Gunnar Sulsher qo‘l ostida o‘z o‘yinini topib borayotgan “Manchester Yunayted” “Orzular teatri” — “Old Trafford”da, APL peshqadamlaridan biri bo‘lib turgan, mavsum chempionligiga asosiy da’vogarlardan biri “Liverpul”ni qabul qiladi. Quyida ushbu uchrashuvga oid ma’lumotlar va qiziqarli faktlar taqdim etiladi.

Musobaqa jadvalidagi holat

“Manchester Yunayted”

Sulsher kelgach “Yunayted”ning ishlari joyiga tushib ketdi. Jamoa yangi murabbiy qo‘l ostida APLda 9 ta o‘yin o‘tkazib, 8 ta g‘alabaga erishdi va bitta o‘yinda durang qayd etdi. “Qizil iblislar” ketma-ket g‘alabalar sabab musobaqa jadvalidagi holatini ham yaxshilab oldi. Ayni damda klub 26-turdan so‘ng 51 ochko jamg‘arib, 4-o‘rinni band etib turibdi. To‘plar nisbati esa 52-35. “mankunianlar” amaldagi mavsumda o‘z maydonida 12 ta o‘yinda 25 ochko to‘pladi, 25 ta gol urib, 16 ta gol o‘tkazdi. Umuman olgan, “Yunayted” o‘z maydonida har doimgidek, yaxshi natija ko‘rsatishda davom etmoqda.

“Liverpul”

“Liverpul” APLda 2019-yil 12-yanvaridan beri mag‘lub bo‘lganicha yo‘q. Klub 5 ta o‘yinda 3 ta g‘alabaga erishib, 2 ta o‘yinda durang qayd etdi. “Qizillar” 26-turda “Bornmut”ni Muhammad Saloh, Sadio Mane va Jorjinyo Veynaldumlarning gollari evaziga mag‘lub etdi. Klopp jamoasi hisobida ayni damda 65 ochko mavjud. To‘plar nisbati esa 59-15. Mersisaydliklar ayni chog‘da APL 1-2-o‘rinlarini “Manchester Siti” (bitta ko‘p o‘yin o‘tkazgan) bilan bo‘lishib turibdi. Joriy mavsum “Liverpul” safarda 13 ta o‘yin o‘tkazib, 30 ochko jamg‘ardi. 24 ta gol urib, 8 ta gol o‘tkazdi, xolos. Chempionlikka da’vogarlik qilayotgan klub bugun qanday bo‘lmasin, “Yunayted”ni safarda bo‘lsa ham mag‘lub etishga harakat qilib ko‘radi. 

Qiziqarli faktlar

• “Liverpul” APL joriy mavsumining 26 ta o‘yinidan faqat bittasida mag‘lub bo‘ldi (20 ta g‘alaba, 5 ta durang);
• “Manchester Yunayted” APLning so‘nggi 8 ta bellashuvida ham bo‘limlarda ham o‘yinda g‘alaba qozondi;
• Birinchi davradagi bellashuvda “Liverpul” 3:1 hisobida g‘alaba qozongan edi. Endi “qizillar” “Manchester Yunayted”ni 2013/14-yilgi mavsumdan buyon ilk marta ham mehmonda ham yutishga harakat qilib ko‘radi;
• “Liverpul” 1996-yil oktabridan beri ilk marta “Yunayted”ga qarshi safarda APL peshqadamlaridan biri sifatida maydonga tushmoqda;
• “Liverpul” APLning so‘nggi 13 ta safar o‘yinidan atigi bittasida mag‘lub bo‘ldi;
• “Qizil iblislar” APL doirasida o‘z maydonida o‘tgan so‘nggi 6 ta o‘yinda kamida 2 tadan gol urmoqda;
• “Manchester Yunayted” APL doirasida “Liverpul”ga qarshi o‘tgan o‘z maydonidagi so‘nggi 9 ta o‘yindan 7 tasida g‘alaba qozongan;
• “Liverpul” joriy mavsum APLning safardagi barcha o‘yinlarida gol urdi.

Uchrashuv hakami

Uchrashuvni Angliyaning tajribali hakamlaridan biri Maykl Oliver boshqarib boradi. U 2018/19-yilgi mavsumda 21 ta o‘yinda ishladi. U bu o‘yinlarda 62 ta sariq kartochka ko‘rsatdi. Bitta o‘yinga o‘rtacha 3 tadan. 5 marta o‘yinchilarni maydondan chetlatishga majbur bo‘lgan. Bitta o‘yinda o‘rtacha 21 marta qoida buzilishini qayd etadi.

O‘yindan oldingi fikrlar

Bu ikkala jamoa uchun ham birdek o‘ta muhim o‘yin. Biz kuchli to‘rtlikda qolishni istaymiz. “Liverpul”ga qarshi o‘ynaymiz va biz bu “Manchester Yunayted” hamda jamoa muxlislari uchun qanchalik katta ahamiyatga ega ekanligini yaxshi bilamiz. Jamoamiz uchun chaqiruvni kutmoqdamiz. “Yunayted” tarixidagi munosib jamoani qurishni xohlaymiz. Agar biz ularni o‘z uyimizda mag‘lub eta olsak, yangi qadam tashlagan bo‘lamiz. “Tottenhem”, “Arsenal” va “Chelsi”ni safarda yutganimiz ajoyib, biroq o‘zimizni “Old Trafford”da ham ko‘rsatishimiz kerak.Ole-Gunnar Sulsher, “Manchester Yunayted” bosh murabbiyi

Juda muhim o‘yin. Ular juda yaxshi holatda. Jismoniy jihatdan kuchli, o‘ziga to‘liq ishongan va yaxshi himoylanib, ko‘plab hujumlar tashkil qilmoqda. Biz natijaga erishish uchun qo‘ldan kelganicha harakat qilamiz. O‘yinning muhimligini chuqurlashtirmasdan, shunchaki o‘zimizning eng yaxshi o‘yinimizni ko‘rsatishimiz kerak. Hozir “Yunayted”ni mag‘lub etish uchun bizga noqulay vaqt ekanligini va ular uchun esa bu ideal holat ekanligi haqida o‘ylab turganingizni yaxshi bilaman. Ammo biz “Old Trafford”ga kuchsiz raqib sifatida yo‘l olmayapmiz. Biz ham yaxshigina shakllangan jamoamiz, axir.

Yurgen Klopp, “Liverpul” bosh murabbiyi