Азар Агуэрога, Сарри эса яна Гвардиолага қарши. Англия Лига Кубоги кимга насиб қилади? (превью)

Бугун, 24 февраль санасида Англияда 2018/19 йилги футбол мавсумининг илк соврини эгаси маълум бўлади. Англия Лига Кубоги финал беллашувида Маурицио Сарри бошчилигидаги «Челси» клуби Хосеп Гвардиола бошлиқ «Манчестер Сити» билан кураш олиб боради. Қуйида мазкур учрашувга оид маълумотлар ва қизиқарли фактлар тақдим этилади.

«Уэмбли» стадионида ўтадиган Англия Лига Кубоги финали иккала жамоанинг тарихга ўзаро 161-учрашуви сифатида киради. Тарихий статистика Лондон клуби фойдасига. «Аристократлар» 65 та ўйинда ғалаба қозонган, 39 та ўйинда эса дуранг қайд этилган. «Шаҳарликлар» бўлса 56 та ўйинда ғалаба нашидасини сурган. Тўплар нисбати ҳам «Челси» томонни кўрсатмоқда —  220-206. Томонлар жорий мавсум ҳисобидан 4 марта ўзаро дуч келмоқда. Мавсум аввалида (2018 йил, 5 август) жамоалар Англия Суперкубоги учун майдонга тушганди. Ўшанда «шаҳарликлар» Серхио Агуэронинг дубли эвазига 2:0 ҳисобида ғалаба қозониб, Суперкубокни ўзиники қилганди. 2018 йил 8 декабрида эса «Челси» АПЛ доирасида «Сити»ни Нголо Канте ва Давид Луисларнинг голлари эвазига мағлуб этди. 2 ҳафта олдин бўлса, томонлар АПЛнинг 2-даврасида ўзаро дуч келди. Унда «Сити» «Челси»ни шунчаки тор-мор келтирди — 6:1. Шундай экан, бугунги ўйин принципиал аҳамиятга эканлиги сабаб ҳам майдонда ҳақиқий жанг бўлиши кутилмоқда.

Мусобақа йўли

«Челси»

«Челси»нинг финалга қадар етиб келиши бир мунча қийин бўлди. Жамоа 1/16 финалда «Ливерпуль»ни 2:1 ҳисобида катта машаққатлар эвазига мағлуб этган бўлса, 1/8 финалда «Дерби Каунти» устидан 3:2 ҳисобидаги ғалаба қўлга киритилди. Чорак финалда «Борнмут» минимал (1:0) ҳисобда таслим этилди. Ярим финалда бўлса, ҳамшаҳари «Тоттенҳэм»ни мағлуб этиб, финалга чиқди. Сарри жамоаси мусобақа давомида 5 та ўйинда 4 та ғалабага эришди, битта ўйинда эса мағлуб бўлди. 9 та гол урди, 5 та голни ўз дарвозасидан олиб чиқишга мажбур бўлди. Лондонликларнинг мусобақадаги тўпурари эса Эден Азар бўлиб турибди — 3 та гол.

«Манчестер Сити»

«Шаҳарликлар» эса финалга қадар бир мунча осон йўл билан етиб келди. 1/16 финалда «Оксфорд Юнайтед»ни 3:0 ҳисобида мағлуб этилди. 1/8 финал босқичида «Фулҳэм» (2:0) таслим этилган бўлса, чорак финалда «Лестер» (2:1) мусобақадан чиқариб юборилди. Ярим финалда бўлса, «шаҳарликлар» голлар шоусини уюштирди. «Бёртон» жамоаси икки ўйин натижасига кўра, 10:0 ҳисобида тор-мор келтирилди. Гвардиола шогирдлари 5 та ўйинда 5 та ғалаба қозонди. Тўплар нисбати эса 17-1. «Сити»нинг мусобақадаги тўпурари Габриэль Жезус, унинг ҳисобида 5 та гол бор.

Қизиқарли фактлар

• «Манчестер Сити»нинг Лига Кубогидаги мағлубиятсиз ўйинлар серияси 11 та учрашувга етди;
• «Шаҳарликлар» сўнгги 14 та расмий ўйиндан 13 тасида ғалаба қозонди;
• «Сити» «Челси»ни сўнгги 5 та ўйиндан 4 тасида мағлуб этган;
• «Челси» сўнгги 6 та расмий ўйиндан 3 тасида мағлубиятга учради;
• Сарри ва Гвардиола 5 бора ўзаро дуч келган, улардан 4 тасида Маурицио жамоаси мағлуб бўлган.

Ўйиндан олдинги фикрлар

Мен «Саррибол» нима эканлигини билмайман. Англиядаги биринчи кунимда айтганимдек, ҳозир ҳам бунинг нима эканлигига тушунмайман. Бу жумла қайсидир журналдан олинган бўлса керак. Италияда ҳам бундай сўзни ҳеч қачон эшитмаган. Шундай экан мен ҳеч нарсани билмайман. Ҳаммасининг якунида энг асосийси — натижа қолади. Ҳар ҳолда мен шундай ҳисоблайман. Қачонки, жамоа натижа кўрсата олмаса, унда танқидлар учун эшиклар очилади. Фаолиятим давомида фақатгина натижага эҳтиёжим бўлади, бошқасига эмас.Маурицио Сарри, «Челси» бош мураббийи

Саррининг «Челси»даги ҳолати, менинг «Сити»даги ҳолатимдан фарқ қилади. Англиядаги фаолиятимнинг биринчи йилида клуб ҳеч қачон менга шубҳа билан қарамаган. ОАВ эса мени 1 ёки 2 та мағлубиятдан сўнг истеъфога ҳам чиқармаган. Баъзан вазият қийинроқ бўлади, шунда вақт талаб этилади. Мауриционинг АПЛдаги 1-мавсумида ҳам шундай ҳолат кузатилмоқда. Мен Сарри ва «Челси» ҳақида юқори фикрдаман. Агар сиз «Сити»—«Челси» (6:0) ўйинини кўриб бунга ишонмасдирсиз, аммо Саррининг жамоаси баъзи вазиятларда ақлбовар қилмас ишларни қилди.

Хосеп Гвардиола, «Манчестер Сити» бош мураббийи

Тахминий таркиблар