“Real”ga qarshi 2 ta o‘yin kutib turgan “Barselona” “Ramon Sanches Pisxuan”dan omon chiqa oladimi? (prevyu)

Bugun, 23-fevral kuni Kataloniyaning “Barselona” klubi “Real”ga qarshi ikkita uchrashuv oldidan “Ramon Sanches Pisxuan” stadionida “Sevilya” mehmoni bo‘ladi. Quyida ushbu uchrashuvga oid ma’lumotlar va qiziqarli faktlar taqdim etiladi.

Bu shunchaki oddiy yoki o‘tkinchi o‘yin bo‘lmasligini ikkala jamoa ham yaxshi tushunib turibdi. Kataloniyaliklarni Andalusiyada har doimgidek “o‘ta iliq” tarzda qarshi olishlari turgan gap. “Sevilya” bugungi bahsda La Ligadagi barcha muammolarini unutib, bor kuchini maydonda berishga harakat qilishi kutilmoqda. Boisi, klub Yevropa Ligasida “Latsio”ni ikki o‘yin natijasiga ko‘ra, qiyinchiliksiz yengdi va 1/8 finalga yo‘l oldi. Endi esa La Ligadagi natijalarni ham yaxshilash vaqti yetdi. “Barselona” ustidan qozoniladigan muvaffaqiyat esa Pablo Machin shogirdlariga yana ishonchni qaytarishi mumkin.

“Barselona” esa uchrashuvga bir muncha ko‘nglini xotirjam qilib kelmoqda. Klub La Liga musobaqa jadvalida ikkinchi o‘rindagi “Atletiko”dan 7, uchinchi o‘rindagi “Real”dan esa 9 ochkoga ilgarilab ketgan. Ammo Kataloniya klubi ustozi Ernesto Valverde Ispaniya Kubogidagi xatosini (“Sevilya”ga qarshi birinchi o‘yinda ikkinchi tarkibni tushirgan va jamoa mag‘lub bo‘lgandi) takrorlmaslikka harakat qilishi tabiiy hol. Har holda “Real” bilan o‘yindan oldin yaxshi kayfiyatda bo‘lishdan na Valverde va na Messining jamoadoshlari voz kechadi.

Tarkibdagi muammolar haqida gap ketganda, “Sevilya” safida biroz kattaroq muammolar borligi ko‘rinadi. Nolito va Eskudero buguni o‘yinni aniq o‘tkazib yuboradi. Nolito joriy mavsum asosiy tarkibda kam ko‘rinish berayotgan bo‘lsa, Eskuderoning yo‘qligi bilinishi mumkin. Ammo uning o‘rnini Kuinsi Promes bilintirmaslikka harakat qilib ko‘rishi mumkin. “Barselona” safida esa Rafinya, Yasper Sillessen va Artur maydonga tushmaydi. Ular ichida faqatgina Arturning asosiy tarkib o‘yinchisiligini hisobga olinsa, Kataloniya klubi katta xavotirga tushmasa ham bo‘ladi.

Qiziqarli faktlar

• “Barselona” so‘nggi 11 ta o‘yindan 8 tasida darvozasidan gol o‘tkazmadi;
• “Barselona” “Sevilya”ga qarshi 11 ta o‘yindan 9 tasida g‘alaba qozondi;
• “Sevilya” o‘z maydonida o‘tgan so‘nggi 9 ta o‘yinda mag‘lubiyatga uchramadi;
• “Barselona” joriy mavsum uchrashuvlarda 75-daqiqadan so‘ng 16 ta gol urdi. Jami gollarning 26 foizini tashkil qiladi;
• Tomonlarning La Ligadagi so‘nggi 6 ta uchrashuvidan beshtasida “Barsleona” g‘alaba qozongan.

Taxminiy tarkiblar

Uchrashuv hakami

O‘yinni Ispaniyaning tajribali hakamlaridan biri Antonio Mateo Laos boshqarib boradi. U 2018/19-yilgi mavsumda 12 ta o‘yinni boshqardi. 58 ta sariq kartochka ko‘rsatgan. Bitta o‘yinda o‘rtacha 4,8 ta sariqni o‘z cho‘ntagidan chiqarishga majbur bo‘lgan. Atigi 2 ta qizil kartochka ko‘rsatgan. Bitta o‘yinda o‘rtacha 25 ta qoida buzilishini qayd etadi.