Bugun, 20-fevral kuni Axborot va ommaviy kommunikatsiyalar agentligi press-xollida “O‘zbekistonda avtomobil yo‘llari qurilishi: yutuq va muammolar” mavzusida matbuot anjumani bo‘lib o‘tdi. Bu haqda “Daryo” muxbiri Sevara Nishonova xabar berdi.
Tadbirda qayd etilishicha, O‘zbekistondagi barcha ko‘priklar 2019-yilning mart oyi o‘rtasigacha inventarizatsiya qilinadi.
“Hozirgi paytda O‘zbekiston avtomobil yo‘llari qo‘mitasiga tegishli umum foydalanishda bo‘lgan 7 mingta ko‘prik mavjud. Shuningdek O‘zbekiston suv xo‘jaligi va mahalliy hokimiyat, obodonlashtirish boshqarmalariga tegishli ko‘priklar ham bor. Ularning sonini hech kim ayta olmaydi. Ularning qanday ekspluatatsiya qilingani, holati haqida faqat ulardan foydalangan odam ma’lumot berishi mumkin. Bu ko‘priklarning hammasini qisqa muddat ichida qoniqarli holatga keltirib bo‘lmaydi. Hozirgi kunda hamma viloyat, har bitta tumanda ishchi guruh tashkil etilib, o‘rganishlar olib borilmoqda. Birinchi bosqichda mavjud ko‘priklar xatlov qilinmoqda. O‘zi nechta ko‘prik bor, ularni holati qandayligi aniqlanmoqda.
Keyingi bosqich qanday bo‘ladi? Holat qoniqarsiz, ya’ni avariyaviy holatga kelib qolgan ko‘priklarda taqiqlovchi belgilar qo‘yiladi. Yoki yuk ko‘tarish, yoki tezligi bo‘yicha.
Ko‘prik avariyaviy holatda bo‘lsa, bu ko‘prikni aylanib o‘tish, yopish chora-tadbirlari ko‘riladi.
Undan keyingi bosqichda esa ko‘priklar diagnostika qilinadi. Ya’ni qaysi ko‘prikni ta‘mirlash mumkin, qaysi ko‘prikni buzib, qayta qurish kerakligi aniqlanadi. Keyin biz takliflar bilan tegishli tashkilotga chiqamiz, qancha mablag‘ ajratilishi kerakligi aniqlanadi.
O‘zbekistondagi barcha ko‘priklar 2019-yilning mart oyi o‘rtasigacha inventarizatsiya qilinadi”, — deydi O‘zbekiston avtomobil yo‘llari qo‘mitasi vakili.
Qayd etilishicha, ko‘priklarning yaroqlilik muddati 50 yilni tashkil etadi. Biroq bu ham nisbiy ko‘rsatkich bo‘lib, ko‘priklarning qancha muddat xizmat qilishi ulardan qay tarzda foydalanishga bog‘liq.
Izoh (0)