Bugun, 20-fevral kuni Axborot va ommaviy kommunikatsiyalar agentligi press-xollida “O‘zbekistonda avtomobil yo‘llari qurilishi: yutuq va muammolar” mavzusida matbuot anjumani bo‘lib o‘tdi. Bu haqda “Daryo” muxbiri Sevara Nishonova xabar berdi.
Tadbirda O‘zbekiston avtomobil yo‘llari davlat qo‘mitasi rahbar xodimlari OAV vakillarini qiziqtirgan savollarga javob berdi. Xususan, qo‘mita raisining birinchi o‘rinbosari Shuhrat Nazarovning ma’lum qilishicha, O‘zbekistondagi yo‘llarga 2023-yilgacha yangi va zamonaviy yo‘l belgilari o‘rnatiladi.
O‘zbekiston avtomobil yo‘llari qo‘mitasi tizimida “Avtoyo‘lbelgi” unitar korxonasi tashkil etilgan. Mazkur unitar korxonaning asosiy vazifasi mamlakatdagi yo‘l belgilarini sifat darajasidan yangi pog‘onaga olib chiqish hisoblanadi. Korxonaga zarur bo‘lgan asbob-uskunalar, jihozlarni xarid qilib, o‘rnatdik. Ishlab chiqarish jarayoni boshlandi. Bugungi kunda korxona tomonidan zamonaviy nur qaytarish xususiyatiga ega bo‘lgan plyonkalardan foydalangan holda zanglamaydigan metalldan yo‘l belgilari va yo‘l ko‘rsatkichlarini ishlab chiqarish va o‘rnatish yo‘lga qo‘yilgan.Biz 2018-yildan beri zamonaviy yo‘l belgilarini o‘rnatishni boshladik. O‘zi 2021-yilgacha yo‘l belgilarini to‘liq yangilash rejalashtirilayotgan edi.
Endi esa bu muddat 2023-yilgacha uzaytirildi. Nima uchun 2023-yilgacha, degan savolga javob beraman: Biz ko‘chalardagi mavjud yo‘l belgilarini inventarizatsiya qilib chiqdik. Keyingi yillarda qurilgan ichki yo‘llar, yangi uylar orasidagi yo‘llarda yo‘l belgilari umuman mavjud emas. Shuning uchun biz qayta inventarizatsiya qilib chiqqanimizdan so‘ng bu yerda biz 170 mingtaga yaqin yo‘l belgilari o‘rnatilishi kerakligini aniqladik. Shuning uchun, biz mazkur yo‘llarda mavjud bo‘lmagan yo‘l belgilari uchun ham yana ikki yil qo‘shdik.
Biz ichki yo‘llar va magistral yo‘llardagi yo‘l belgilarini alohida inventarizatsiya qilib, ularga qancha mablag‘ sarflanishini moliya vazirligi bilan maslahatlashganmiz. Shunday qilib, 2023-yilgacha O‘zbekistondagi barcha yo‘l belgilari zamonaviylariga almashtiriladi.
Asosiy o‘rnatiladigan yo‘l belgilari 2019-yilga to‘g‘ri keladi. Joriy yilda biz ko‘chalarga 81 862 ta yangi yo‘l belgilarini o‘rnatamiz. 56 411 ta yo‘l belgisi magistral yo‘llarga, 25 451 donasi esa ichki xo‘jalik yo‘llariga o‘rnatiladi. Yo‘l belgilarining eng asosiy miqdori 2019—2020-yillarda o‘rnatiladi, qolgan yillarda bu ko‘rsatkich keskin pasayib boradi. Shuningdek, yo‘l belgilarini xizmat ko‘rsatish muddatini uzaytirganmiz. Hoizrda ishlab chiqarilayotgan yo‘l belgilari eng kamida 8—10 yil xizmat ko‘rsatadi. Bundan tashqari, 10 yildan 15 yilgacha xizmat ko‘rsatadigan yo‘l belgilarini ishlab chiqarish ham yo‘lga qo‘yilgan.
Yotiq yo‘l belgilari — yo‘l chiziqlarni chizish masalasiga ham alohida e‘tibor bermoqdamiz. Joriy yilda 20 000 kilometrdan uzunroq yo‘llarga yo‘l chiziqlarini chizish, bevosita shahar ichidagi 13 000 kilometrdan uzunroq yo‘llarga ham shunday chiziqlarni chizishni rejalashtirmoqdamiz.
Shuhrat Nazarov, O‘zbekiston avtomobil yo‘llari davlat qo‘mitasi raisining birinchi o‘rinbosari
Izoh (0)