Бугун, 20 февраль куни Ахборот ва оммавий коммуникациялар агентлиги пресс-холлида «Ўзбекистонда автомобиль йўллари қурилиши: ютуқ ва муаммолар» мавзусида матбуот анжумани бўлиб ўтди. Бу ҳақда «Дарё» мухбири Севара Нишонова хабар берди.
Тадбирда қайд этилишича, Ўзбекистондаги барча кўприклар 2019 йилнинг март ойи ўртасигача инвентаризация қилинади.
«Ҳозирги пайтда Ўзбекистон автомобиль йўллари қўмитасига тегишли умум фойдаланишда бўлган 7 мингта кўприк мавжуд. Шунингдек Ўзбекистон сув хўжалиги ва маҳаллий ҳокимият, ободонлаштириш бошқармаларига тегишли кўприклар ҳам бор. Уларнинг сонини ҳеч ким айта олмайди. Уларнинг қандай эксплуатация қилингани, ҳолати ҳақида фақат улардан фойдаланган одам маълумот бериши мумкин. Бу кўприкларнинг ҳаммасини қисқа муддат ичида қониқарли ҳолатга келтириб бўлмайди. Ҳозирги кунда ҳамма вилоят, ҳар битта туманда ишчи гуруҳ ташкил этилиб, ўрганишлар олиб борилмоқда. Биринчи босқичда мавжуд кўприклар хатлов қилинмоқда. Ўзи нечта кўприк бор, уларни ҳолати қандайлиги аниқланмоқда.
Кейинги босқич қандай бўлади? Ҳолат қониқарсиз, яъни авариявий ҳолатга келиб қолган кўприкларда тақиқловчи белгилар қўйилади. Ёки юк кўтариш, ёки тезлиги бўйича.
Кўприк авариявий ҳолатда бўлса, бу кўприкни айланиб ўтиш, ёпиш чора-тадбирлари кўрилади.
Ундан кейинги босқичда эса кўприклар диагностика қилинади. Яъни қайси кўприкни таъмирлаш мумкин, қайси кўприкни бузиб, қайта қуриш кераклиги аниқланади. Кейин биз таклифлар билан тегишли ташкилотга чиқамиз, қанча маблағ ажратилиши кераклиги аниқланади.
Ўзбекистондаги барча кўприклар 2019 йилнинг март ойи ўртасигача инвентаризация қилинади», — дейди Ўзбекистон автомобиль йўллари қўмитаси вакили.
Қайд этилишича, кўприкларнинг яроқлилик муддати 50 йилни ташкил этади. Бироқ бу ҳам нисбий кўрсаткич бўлиб, кўприкларнинг қанча муддат хизмат қилиши улардан қай тарзда фойдаланишга боғлиқ.
Изоҳ (0)