Moskva viloyati Ivanteyevka sudi 2017-yilning kuzida o‘qituvchi va maktab o‘quvchilariga hujum qilgan o‘smir Mixailni yetti yil-u uch oy muddatga axloq tuzatish koloniyasiga hukm qildi. Bu haqda TJournal xabar qildi.
Fevral oyi boshida Ivanteyevka prokuraturasi shahar sudidan sudlanuvchini 9,5 yilga ozodlikdan mahrum etishni va jabrlanuvchilarning har biriga ma’naviy zararni qoplash uchun 500 mingdan 800 ming rublgacha (7500 dollardan 12000 dollargacha) bo‘lgan summani to‘lattirishni so‘ragan.
2018-yil 7-sentabrda Moskvaning Basman sudi uni 5-noyabrgacha hibsda ushlashga hukm chiqargan. Hibsdaligida ayblanuvchi jabrlanuvchilardan uzr so‘ragan. Uning ota-onasi esa yetkazilgan jismoniy va ma’naviy zarar uchun badal to‘lashga va’da bergan.
O‘sha kuni VKontakte Mixailning sahifasini ota-onasining iltimosiga ko‘ra blokladi. O‘smir sahifasida “delete my life 05.09.2017” (“hayotimni 05.09.2017 kuni o‘chirib yubor”) degan status, qurol bilan tushgan rasm va 1999-yilda “Kolumbayn” maktabidagi ommaviy qotillik haqida post qoldirgan edi.
5-sentabr kuni Ivanteyevkadagi 1-maktabning 9-“A” sinf o‘quvchisi Mixail maktabga oshxona boltasi, miltiq va qo‘lbola portlovchi paket olib kelgan. U o‘qituvchining boshiga bolta bilan urgan, keyin miltiqdan o‘q uzib, portlovchi paketni portlatgan. Natijada to‘rt kishi jarohatlangan: o‘qituvchi va uch nafar o‘quvchi derazadan sakrab, omon qolishga harakat qilgan.
Izoh (0)