Jizzax shahrida Loyiha boshqaruvi milliy agentligi tomonidan tadbirkorlikni qo‘llab-quvvatlashga qaratilgan “Ilg‘or hudud” biznes-inkubatorning ochilishi haqida e’lon qilindi. Bu haqda “Daryo”ga agentlik matbuot xizmati xabar bergan.
Ayni damda Loyiha boshqaruvi milliy agentligi rahbariyati tomonidan dasturni qo‘llab-quvvatlash strategiyasi ishlab chiqilgan. Bu strategiyaning birinchi qadami Jizzaxda biznes-inkubatorni ochish tashabbusi bo‘ldi. Bu tadbirkorlar uchun ko‘plab muammolarni hal etish imkonini yaratadi.
Xususan unda loyiha uchun moliyalashtirish manbasini qanday qilib topish va investorni jalb qilish, biznes-reja tuzish, xavf-xatarlarni to‘g‘ri hisoblash, mahsulotni sotish kanallarini topish va uning sotilishini to‘g‘ri tashkil qilish bo‘yicha barcha savollarga javob topish mumkin bo‘ladi.
Ushbu loyihaga ko‘ra, tadbirkor o‘z g‘oyasi bilan biznes-inkubatorga keladi va loyiha bosqichida uning maslahatchilari va mutaxassislari bilan birgalikda o‘z g‘oyasi ustida ishlaydi. Loyiha shakllantirilgandan so‘ng, biznes-reja ishlab chiqiladi, loyiha ekspertizadan o‘tadi. Tanlov natijalariga ko‘ra eng yaxshi loyihalar tanlab olinadi. G‘olib chiqqan tadbirkor va LBMA o‘rtasida investitsion memorandum imzolanadi hamda sheriklik asosida ish yo‘lga qo‘yiladi.
Dastlabki bosqichda LBMA qoshidagi biznes-inkubator yosh tadbirkorning biznesi uchun moliyaviy yordam ko‘rsatilib, to‘liq qo‘llab-quvvatlanadi.
Biznes-inkubatorning ochilishi 2019-yilning 1-mart kuniga rejalashtirilgan. Biznes-inkubator idorasi LBMAning Jizzax shahridagi vakolatxonasi binosida joylashadi.
Ta’kidlash joizki, dasturni moliyalashtirish dastlabki bosqichda LBMA tomonidan, keyinroq xalqaro va mahalliy investitsion maydonlar, investitsion kompaniyalar, chet davlatlarning investitsion dasturlar, Jahon banki, xorijiy banklar va mahalliy tijorat banklari manbalari asosida amalga oshiriladi.
Izoh (0)