Turizmni rivojlantirish davlat qo‘mitasi hamda Qashqadaryo viloyat hokimligi tomonidan Shahrisabzga jurnalistlar va turoperatorlar uchun “Info-tur” tashkil etildi. Bu haqda “Daryo”ga jurnalist Manzura Bekjonova ma’lum qildi.
Unda hududning turistik salohiyatini yuksaltirish, uni festivallar shahriga aylantirish borasida amalga oshirilayotgan ishlar haqida keng ma’lumot berildi.
Turizmni rivojlantirish Davlat qo‘mitasi Qashqadaryo viloyati hududiy boshqarmasi boshlig‘i Otabek Olimjonovning ma’lum qilishicha, keyingi vaqtda hududda e’tirof qilishga arzigulik ishlar amalga oshirilmoqda.
Mavjud mehmonxonalar zamon talablari asosida modernizatsiya qilingan, o‘nlab yangi mehmonxonalar, yuzga yaqin mehmon uylari tashkil qilingan. Shahrisabzga qo‘yilgan “Afrosiyob” tezyurar poyezdi sayyohlar qatnovini qulaylashtirdi.
2019—2020-yillarda sohada qiymati 299,3 milliard so‘m (tadbirkorlarning o‘z mablag‘lari 206,6 milliard so‘m, bank krediti 92,7 milliard so‘m) o‘zlashtirish hisobiga 72 ta loyihalar amalga oshiriladi.
Jumladan, mehmonxonalar tashkil qilish bo‘yicha 148,5 milliard so‘m mablag‘ hisobiga 15 ta mehmonxona, 1,8 milliard so‘m mablag‘ hisobiga 40 ta mehmon uylari, o‘tov uylar va dam olish uylarini tashkil etish loyihalari, 72 milliard so‘m mablag‘ o‘zlashtirish hisobiga to‘rtta aholi dam olish maskanlari barpo etiladi.Hududning tabiiy qulayliklari keng.
Mavjud imkoniyatlardan foydalanib, ekoturizm, etnoturizm, ziyorat va ekstremal turizm kabi yangi yo‘nalishlarini rivojlantirishga hissa qo‘shuvchi loyihalar ishlab chiqilmoqda.
Shahrisabz bu yilgi festivallar mavsumini 20-mart kuni Milliy liboslar festivali bilan boshlab beradi. Milliy podium minbarida jahonning yirik festivallarida betakror ijod namunalari bilan qatnashib, yuksak e’tirofga sazovor bo‘lgan modelyer va hunarmandlar ishtirok etadi.
Shahardagi Amir Temur xiyoboni va “Oq saroy” majmuasi xiyoboni milliy bezaklar bilan bezatilib, har bir shahar va tumanlarning milliy liboslari, urf-odatlari, taomlari namoyish etiladi.
“Info-tur” doirasidagi matbuot anjumanida mohir hunarmandlar o‘z rejalari haqida so‘zlab berdi, Milliy liboslar festivalining targ‘ibot roligi namoyish etildi.
Joriy yilning aprel oyida Qashqadaryo viloyatining Shahrisabz va Kitob tumanlarida xalqaro miqyosda ilk bor Aeronavtika festivali bo‘lib o‘tadi.
Birinchi Kitob-Shahrisabz aeronavtika xalqaro festivali shu yilning 26-aprel sanasiga mo‘ljallangan va har yili o‘tkazib boriladi.
Izoh (0)