Жиззах шаҳрида Лойиҳа бошқаруви миллий агентлиги томонидан тадбиркорликни қўллаб-қувватлашга қаратилган «Илғор ҳудуд» бизнес-инкубаторнинг очилиши ҳақида эълон қилинди. Бу ҳақда «Дарё»га агентлик матбуот хизмати хабар берган.
Айни дамда Лойиҳа бошқаруви миллий агентлиги раҳбарияти томонидан дастурни қўллаб-қувватлаш стратегияси ишлаб чиқилган. Бу стратегиянинг биринчи қадами Жиззахда бизнес-инкубаторни очиш ташаббуси бўлди. Бу тадбиркорлар учун кўплаб муаммоларни ҳал этиш имконини яратади.
Хусусан унда лойиҳа учун молиялаштириш манбасини қандай қилиб топиш ва инвесторни жалб қилиш, бизнес-режа тузиш, хавф-хатарларни тўғри ҳисоблаш, маҳсулотни сотиш каналларини топиш ва унинг сотилишини тўғри ташкил қилиш бўйича барча саволларга жавоб топиш мумкин бўлади.
Ушбу лойиҳага кўра, тадбиркор ўз ғояси билан бизнес-инкубаторга келади ва лойиҳа босқичида унинг маслаҳатчилари ва мутахассислари билан биргаликда ўз ғояси устида ишлайди. Лойиҳа шакллантирилгандан сўнг, бизнес-режа ишлаб чиқилади, лойиҳа экспертизадан ўтади. Танлов натижаларига кўра энг яхши лойиҳалар танлаб олинади. Ғолиб чиққан тадбиркор ва ЛБМА ўртасида инвестицион меморандум имзоланади ҳамда шериклик асосида иш йўлга қўйилади.
Дастлабки босқичда ЛБМА қошидаги бизнес-инкубатор ёш тадбиркорнинг бизнеси учун молиявий ёрдам кўрсатилиб, тўлиқ қўллаб-қувватланади.
Бизнес-инкубаторнинг очилиши 2019 йилнинг 1 март кунига режалаштирилган. Бизнес-инкубатор идораси ЛБМАнинг Жиззах шаҳридаги ваколатхонаси биносида жойлашади.
Таъкидлаш жоизки, дастурни молиялаштириш дастлабки босқичда ЛБМА томонидан, кейинроқ халқаро ва маҳаллий инвестицион майдонлар, инвестицион компаниялар, чет давлатларнинг инвестицион дастурлар, Жаҳон банки, хорижий банклар ва маҳаллий тижорат банклари манбалари асосида амалга оширилади.
Изоҳ (0)