O‘zbekistonda nikohdan o‘tmasdan yashab kelayotgan 10 ming 24 nafar oila aniqlandi. Ularning 6,5 mingga yaqinida nikoh rasmiylashtirildi. Bu haqda “Oila davrasida” gazetasiga asoslanib “Kun.uz” xabar bermoqda.
Qayd etilishicha, FHDYo organlari tizimida o‘tkazilgan o‘rganishlar “demografik statistikada katta xatolar bor”ligini ko‘rsatgan.
“Chekka hududlarda istiqomat qilayotgan aholi tug‘ilgan chaqaloqlarni ro‘yxatdan o‘tkazish, nikohni rasmiylashtirishga befarq qarab kelmoqda. Xususan, 9 988 nafar bolaning tug‘ilganlik haqidagi hujjati mavjud emas. Shuningdek, qayd etilmagan hujjatlarning 90 foizga yaqini aynan tug‘ilish va nikoh haqidagi guvohnomalarga to‘g‘ri keladi”, — deyiladi xabarda.
Yuridik nuqtai nazardan mazkur hujjatlarning mavjud emasligi fuqarolarni qonuniy huquq va erkinliklaridan mahrum qiladi. Rasmiy guvohnomasi mavjud bo‘lmaganlar yo‘q shaxslar, deb hisoblanadi. Masalan, tug‘ilganlik to‘g‘risidagi guvohnomasiz bolani bog‘chaga rasmiylashtirib bo‘lmaydi, maktabga qabul qilinmaydi.
Qo‘shimcha qilishlaricha, fuqarolik holati dalolatnomalarining o‘z vaqtida qayd etilmaganini aniqlash bo‘yicha inventarizatsiya tadbirlari 2019-yil 1-iyulga qadar davom etadi.
Izoh (0)