Andijonda o‘tkazilgan uch kunlik xronometraj tadbirlarida savdo tushumlari salkam 120 million so‘mga oshirildi. Bu haqda Andijon viloyati davlat soliq boshqarmasi matbuot xizmati xabar berdi.
Andijon viloyati davlat soliq boshqarmasi tomonidan joriy yilning o‘tgan davri mobaynida o‘tkazilgan 292 ta xronometraj tadbirida 150 nafar kishi norasmiy ravishda ishlayotganligi aniqlandi.
Xususan, Oltinko‘l tumani “Qo‘shtepa saroy” mahalla hududida faoliyat yuritayotgan “Mubina grand tekstil” mas’uliyati cheklangan jamiyati hisobotlarida 33 nafar xodim ishlayotganligini ko‘rsatib kelgan. Tadbir chog‘ida korxona 62 nafar ishchisiga konvert usulida maosh berib kelayotganligi ayon bo‘ldi.
“Qo‘shimcha ishchi” o‘rni yaratib, ularni yashirish borasida “Oltinko‘l universal savdo” markazi ham aslo qolishmagan. Hujjatda 22 nafar xodim bor. Ammo 34 kishi mehnat qilayotganligi aniqlandi.
“Ittifoq” mahallasidagi “Oltinko‘l non ishlab chiqarish” mas’uliyati cheklangan jamiyati halollikdan ko‘ra, daromad cho‘g‘ini ustun qo‘ydi. Aslida 12 kishi mehnat qilayotgan bo‘lsa-da, jamiyat o‘z hisobotlarida faqat 1 nafar xodimni ko‘rsatgan xolos. 11 ishchiga “konvert” usulida haq to‘lab kelgan.
Shuningdek, xronometraj tadbirlarida savdo tushumi o‘tgan haftaning mos kunlariga nisbatan “Darvoza savdo” mas’uliyati cheklangan jamiyati Qo‘rg‘ontepa shoxobchasida 5 million 860 ming so‘mga, Asaka shoxobchasida 24 million 484 ming so‘mga, Izboskan shoxobchasida esa 3 million 695 ming so‘mga oshdi.
Umuman olganda, uch kunlik tadbir mobaynida 8 ta tadbirkorlik subyektining savdo tushumlari 122,9 foizga oshib, 119 million 868 ming so‘mni tashkil etishiga erishildi.
Izoh (0)