Андижонда ўтказилган уч кунлик хронометраж тадбирларида савдо тушумлари салкам 120 миллион сўмга оширилди. Бу ҳақда Андижон вилояти давлат солиқ бошқармаси матбуот хизмати хабар берди.
Андижон вилояти давлат солиқ бошқармаси томонидан жорий йилнинг ўтган даври мобайнида ўтказилган 292 та хронометраж тадбирида 150 нафар киши норасмий равишда ишлаётганлиги аниқланди.
Хусусан, Олтинкўл тумани «Қўштепа сарой» маҳалла ҳудудида фаолият юритаётган «Мубина гранд текстиль» масъулияти чекланган жамияти ҳисоботларида 33 нафар ходим ишлаётганлигини кўрсатиб келган. Тадбир чоғида корхона 62 нафар ишчисига конверт усулида маош бериб келаётганлиги аён бўлди.
«Қўшимча ишчи» ўрни яратиб, уларни яшириш борасида «Олтинкўл универсал савдо» маркази ҳам асло қолишмаган. Ҳужжатда 22 нафар ходим бор. Аммо 34 киши меҳнат қилаётганлиги аниқланди.
«Иттифоқ» маҳалласидаги «Олтинкўл нон ишлаб чиқариш» масъулияти чекланган жамияти ҳалолликдан кўра, даромад чўғини устун қўйди. Аслида 12 киши меҳнат қилаётган бўлса-да, жамият ўз ҳисоботларида фақат 1 нафар ходимни кўрсатган холос. 11 ишчига «конверт» усулида ҳақ тўлаб келган.
Шунингдек, хронометраж тадбирларида савдо тушуми ўтган ҳафтанинг мос кунларига нисбатан «Дарвоза савдо» масъулияти чекланган жамияти Қўрғонтепа шохобчасида 5 миллион 860 минг сўмга, Асака шохобчасида 24 миллион 484 минг сўмга, Избоскан шохобчасида эса 3 миллион 695 минг сўмга ошди.
Умуман олганда, уч кунлик тадбир мобайнида 8 та тадбиркорлик субъектининг савдо тушумлари 122,9 фоизга ошиб, 119 миллион 868 минг сўмни ташкил этишига эришилди.
Изоҳ (0)