Andijon viloyat xotin-qizlar qo‘mitasi qoshidagi “Mehrimiz sizga” ayollarni ijtimoiy reabilitatsiya qilish va moslashtirish markazida tashkil etilgan Ishonch telefoni orqali qiyin ahvolga tushib qolgan xotin-qizlar tomonidan o‘tgan yil mobaynida bir yuz ellikdan ortiq murojaat kelib tushgan. Bu haqda 22-yanvar kuni markaz maqsad-vazifalari hamda faoliyatiga bag‘ishlangan brifingda ishtirok etgan jurnalist Umidjon Mamarasulov xabar bermoqda.
Mutaxassislar tomonidan ularga ruhiy, tibbiy, huquqiy va ijtimoiy masalalarda maslahatlar berilgan. Shuningdek, kam ta’minlangan, qiyin ahvolga tushib qolgan fuqarolarni ijtimoiy qo‘llab-quvvatlash, yoshlarni turmushga tayyorlash, ishsiz xotin-qizlarni kasb-hunarga o‘rgatish, uy mehnati va kasanachilikka jalb etish, xususiy biznes va oilaviy tadbirkorlikni yo‘lga qo‘yish bo‘yicha kerakli yordamlar ko‘rsatilgan.
— Jamoatchilik asosida ishlayotgan ruhshunos, shifokor, huquqshunoslar va ijtimoiy xodimlar tarafidan ko‘rsatilgan yordamlar tufayli murojaatchilarning ruhiy, tibbiy, huquqiy, ijtimoiy, iqtisodiy masalalardagi muammolari hal etilmoqda, — deydi markaz rahbari Xolidaxon Mirzarahimova. – Shu kunga qadar mutaxassislar tomonidan ikki mingga yaqin fuqaroga psixolog, huquqshunos va shifokor maslahati ko‘rsatilgan. Ellik nafardan ortiq ayolga ijtimoiy yordam berilgan.
Ish bilan band bo‘lmagan, ishsiz xotin-qizlarni kasb-hunarga o‘rgatish uchun markazda kichik tikuvchilik sexi va tikuvchilik kurslari tashkil etilgan. Unda kam ta’minlangan oilada yashovchi, vaqtincha ishsiz, ijtimoiy himoyaga muhtoj, odam savdosidan jabrlangan 28 nafar xotin-qiz kasb-hunarga o‘qitilib, egallagan kasbi bo‘yicha ishga joylashtirilgan.
Viloyat hokimi o‘rinbosari, xotin-qizlar qo‘mitasi raisi Manzuraxon Yunusovaning aytishicha, markaz Prezidentning 2018-yil 2-iyuldagi “Ijtimoiy reabilitatsiya qilish va moslashtirish, shuningdek, oilaviy-maishiy zo‘rlik ishlatishning oldini olish tizimini takomillashtirish chora-tadbirlari to‘g‘risida”gi qaroriga asosan oktabr oyida qayta tashkil etilgan. Markaz uchun viloyat hokimligi tomonidan alohida bino ajratilib, kapital rekonstruksiya qilindi va zamonaviy orgtexnika vositalari, zarur mebel anjomlari hamda o‘quv jihozlari bilan ta’minlangan.
Ma’lumot uchun: Andijon shahridagi “Mehrimiz sizga” ayollar va ularning oila a’zolarini ijtimoiy qo‘llab-quvvatlash markazi 2007-yilda nodavlat-notijorat tashkiloti sifatida tashkil etilgan. Markazning asosiy faoliyati odam savdosining oldini olish, odam savdosi qurboniga aylangan va og‘ir ruhiy holatga tushib qolgan xotin-qizlar va ularning oilalariga ijtimoiy, tibbiy va ruhiy yordam ko‘rsatishga qaratilgan.
Izoh (0)