Andijon shahridagi “Eski shahar dehqon bozori”ning kirish qismida Andijon davlat tibbiyot instituti hamda O‘zbekiston “Adolat” SDP viloyat Kengashi hamkorligida aholi orasida tibbiy madaniyatni oshirish, favqulodda holatlarda birinchi tez tibbiy yordam ko‘rsatish, shifokor taktikasi, oilalarda sog‘lom turmush tarzini shakllantirish maqsadida ommaviy tadbir o‘tkazildi. Bu haqda institut matbuot xizmati “Daryo”ga xabar bermoqda.
Tadbirda O‘zbekiston yoshlar ittifoqi institut boshlang‘ich tashkiloti faollari tomonidan miokard infarkt, qandli diabet, sinish, kuyish kabi holatlarda shifokor kelgunga qadar birinchi tibbiy yordam ko‘rsatish ko‘nikmalari hamda mutaxassis yordami sahna ko‘rinishi orqali namoyish etilib, atroflicha izohlab berildi.
Aholiga sog‘lom turmush tarzini targ‘ib etuvchi bukletlar tarqatildi. Turli kasalliklarning oldini olish va ularni davolash borasida savol-javoblar ham bo‘ldi.
Fuqarolar tomonidan qiziqish bilan qarshi olingan mazkur tadbirni kelgusida viloyatning shahar va tumanlarida, aholi gavjum joylarda ham o‘tkazish rejalashtirilgan.
Izoh (0)