Андижон вилоят хотин-қизлар қўмитаси қошидаги «Меҳримиз сизга» аёлларни ижтимоий реабилитация қилиш ва мослаштириш марказида ташкил этилган Ишонч телефони орқали қийин аҳволга тушиб қолган хотин-қизлар томонидан ўтган йил мобайнида бир юз элликдан ортиқ мурожаат келиб тушган. Бу ҳақда 22 январь куни марказ мақсад-вазифалари ҳамда фаолиятига бағишланган брифингда иштирок этган журналист Умиджон Мамарасулов хабар бермоқда.
Мутахассислар томонидан уларга руҳий, тиббий, ҳуқуқий ва ижтимоий масалаларда маслаҳатлар берилган. Шунингдек, кам таъминланган, қийин аҳволга тушиб қолган фуқароларни ижтимоий қўллаб-қувватлаш, ёшларни турмушга тайёрлаш, ишсиз хотин-қизларни касб-ҳунарга ўргатиш, уй меҳнати ва касаначиликка жалб этиш, хусусий бизнес ва оилавий тадбиркорликни йўлга қўйиш бўйича керакли ёрдамлар кўрсатилган.
— Жамоатчилик асосида ишлаётган руҳшунос, шифокор, ҳуқуқшунослар ва ижтимоий ходимлар тарафидан кўрсатилган ёрдамлар туфайли мурожаатчиларнинг руҳий, тиббий, ҳуқуқий, ижтимоий, иқтисодий масалалардаги муаммолари ҳал этилмоқда, — дейди марказ раҳбари Холидахон Мирзараҳимова. – Шу кунга қадар мутахассислар томонидан икки мингга яқин фуқарога психолог, ҳуқуқшунос ва шифокор маслаҳати кўрсатилган. Эллик нафардан ортиқ аёлга ижтимоий ёрдам берилган.
Иш билан банд бўлмаган, ишсиз хотин-қизларни касб-ҳунарга ўргатиш учун марказда кичик тикувчилик цехи ва тикувчилик курслари ташкил этилган. Унда кам таъминланган оилада яшовчи, вақтинча ишсиз, ижтимоий ҳимояга муҳтож, одам савдосидан жабрланган 28 нафар хотин-қиз касб-ҳунарга ўқитилиб, эгаллаган касби бўйича ишга жойлаштирилган.
Вилоят ҳокими ўринбосари, хотин-қизлар қўмитаси раиси Манзурахон Юнусованинг айтишича, марказ Президентнинг 2018 йил 2 июлдаги «Ижтимоий реабилитация қилиш ва мослаштириш, шунингдек, оилавий-маиший зўрлик ишлатишнинг олдини олиш тизимини такомиллаштириш чора-тадбирлари тўғрисида»ги қарорига асосан октябрь ойида қайта ташкил этилган. Марказ учун вилоят ҳокимлиги томонидан алоҳида бино ажратилиб, капитал реконструкция қилинди ва замонавий оргтехника воситалари, зарур мебел анжомлари ҳамда ўқув жиҳозлари билан таъминланган.
Маълумот учун: Андижон шаҳридаги «Меҳримиз сизга» аёллар ва уларнинг оила аъзоларини ижтимоий қўллаб-қувватлаш маркази 2007 йилда нодавлат-нотижорат ташкилоти сифатида ташкил этилган. Марказнинг асосий фаолияти одам савдосининг олдини олиш, одам савдоси қурбонига айланган ва оғир руҳий ҳолатга тушиб қолган хотин-қизлар ва уларнинг оилаларига ижтимоий, тиббий ва руҳий ёрдам кўрсатишга қаратилган.
Изоҳ (0)