16-dekabrning asosiy yangiliklari — “Daryo” dayjestida.
O‘zbekistonda xizmat ko‘rsatgan artist Obid Asomovning 14-dekabr kuni 55 yoshida to‘satdan vafot etishi, 2018-yilda hayotni tark etgan ko‘plab mashhur insonlarni eslatdi. 2018-yilda vafot etgan o‘zbekistonlik mashhur insonlar orasida kinorejissor Shuhrat Abbosov, aktyor Husan Sharipov, aktrisa Farangiz Rejametova, sportchi Jamshid Kenjayev va boshqalar bor.
***
Kelasi hafta O‘zbekistonda havo sovib ketadi. 17-dekabr, dushanba kuni kunduzi havo harorati 10 daraja iliqni tashkil etadi, biroz yog‘ingarchilik kuzatilishi mumkin. Ammo 18-dekabrdan boshlab harorat keskin tushadi. Xususan, 18—19-dekabr kunlari havo 3—8 daraja iliqqacha soviydi, 19-dekabrda esa kunduzgi harorat 0—5 darajaga teng bo‘ladi.
***
Toshkent shahridagi 505 ta mahalla fuqarolar yig‘ini tomonidan tayyorlangan Qorbobo kiyimlari 16-dekabr kuni mahalladagi posbonlar va ko‘ngillilarga tarqatilgan. “Mahallada Yangi yil” deb nomlangan ushbu loyiha doirasida mahallalarda yashovchi nogironligi bo‘lgan shaxslar, kam ta’minlanganlar, yuz yoshdan oshgan hamda Ikkinchi jahon urushi qatnashchilari uylarida bayram tashkillashtiriladi.
***
Toshkent shahar hokimligi tashabbusi bilan joriy yilning 15-dekabridan boshlab poytaxtdagi 8 ta bozorda bayramoldi savdo yarmarkalari tashkil qilindi. Savdo yarmarkalari Qo‘yliq, Qoraqamish, Yunusobod, Eski juva, Farhod, Oloy, Askiya, Aviasozlar dehqon bozorlarida tashkil etildi.
***
Transport vositalari haydovchilarining mast holatda ekanligini aniqlash tartibi to‘g‘risidagi nizom Adliya vazirligida davlat ro‘yxatidan o‘tkazildi. Unga ko‘ra, Haydovchilarning mast holatda ekanligini aniqlash bo‘yicha tekshiruv alkotester (havoga chiqarilgan etanol bug‘larini aniqlovchi va tekshiruv natijalarini qog‘ozda aks ettiruvchi maxsus texnik vosita) yordamida amalga oshiriladi.
Izoh (0)