16 декабрнинг асосий янгиликлари — «Дарё» дайжестида.
Ўзбекистонда хизмат кўрсатган артист Обид Асомовнинг 14 декабрь куни 55 ёшида тўсатдан вафот этиши, 2018 йилда ҳаётни тарк этган кўплаб машҳур инсонларни эслатди. 2018 йилда вафот этган ўзбекистонлик машҳур инсонлар орасида кинорежиссёр Шуҳрат Аббосов, актёр Ҳусан Шарипов, актриса Фарангиз Режаметова, спортчи Жамшид Кенжаев ва бошқалар бор.
***
Келаси ҳафта Ўзбекистонда ҳаво совиб кетади. 17 декабрь, душанба куни кундузи ҳаво ҳарорати 10 даража илиқни ташкил этади, бироз ёғингарчилик кузатилиши мумкин. Аммо 18 декабрдан бошлаб ҳарорат кескин тушади. Хусусан, 18—19 декабрь кунлари ҳаво 3—8 даража илиққача совийди, 19 декабрда эса кундузги ҳарорат 0—5 даражага тенг бўлади.
***
Тошкент шаҳридаги 505 та маҳалла фуқаролар йиғини томонидан тайёрланган Қорбобо кийимлари 16 декабрь куни маҳалладаги посбонлар ва кўнгиллиларга тарқатилган. «Маҳаллада Янги йил» деб номланган ушбу лойиҳа доирасида маҳаллаларда яшовчи ногиронлиги бўлган шахслар, кам таъминланганлар, юз ёшдан ошган ҳамда Иккинчи жаҳон уруши қатнашчилари уйларида байрам ташкиллаштирилади.
***
Тошкент шаҳар ҳокимлиги ташаббуси билан жорий йилнинг 15 декабридан бошлаб пойтахтдаги 8 та бозорда байрамолди савдо ярмаркалари ташкил қилинди. Савдо ярмаркалари Қўйлиқ, Қорақамиш, Юнусобод, Эски жува, Фарҳод, Олой, Аския, Авиасозлар деҳқон бозорларида ташкил этилди.
***
Транспорт воситалари ҳайдовчиларининг маст ҳолатда эканлигини аниқлаш тартиби тўғрисидаги низом Адлия вазирлигида давлат рўйхатидан ўтказилди. Унга кўра, Ҳайдовчиларнинг маст ҳолатда эканлигини аниқлаш бўйича текширув алкотестер (ҳавога чиқарилган этанол буғларини аниқловчи ва текширув натижаларини қоғозда акс эттирувчи махсус техник восита) ёрдамида амалга оширилади.
Изоҳ (0)