“Adolat” SDPning “Ta’lim sifati — partiya nigohida” loyihasi doirasida jamoatchilik nazorati tartibida maktab darsliklarining sifati, ularda yo‘l qo‘yilgan xato-kamchiliklar o‘rganildi. Partiya gazetasining 50-sonida mazkur o‘rganishlarning natijalari bo‘yicha maqola chop etildi. Unda darsliklardagi xatolar aniq misollarda keltirib o‘tilgan, deb yozadi UZ24.
Jumladan, 1-sinf darsligi “Alifbe”, 2-sinf “Ingliz tili”, 3-sinf “Matematika”, 4-sinf “Ingliz tili”, 5-sinf “Ona tili”, 6-sinf “Botanika”, 7-sinf “Jahon tarixi”, “O‘zbekiston tarixi”, 8-sinf “O‘zbekiston tarixi”, 9-sinf “Kimyo”, “Jahon tarixi”, qoraqalpoq tilida nashr etilgan “O‘zbekiston tarixi”, 10-sinf “Ingliz tili”, “Biologiya” darsliklarida bir qancha xatoliklar aniqlangan.
Masalan, 7-sinf “O‘zbekiston tarixi” kitobi (Qayta ishlangan 3-nashr. “Sharq” NMAK - 2017). Darslikning 94-betida “Abu Nasr Forobiy (873—950) Aris suvining Sirdaryoga quyilishida Forob shahrida tug‘ilgan”, deyilgan. Xuddi shu darslikning ruscha nashrida esa “Abu Nasr Farabi (1230—1270) rodilsya v gorode Farab”, deb yozilgan.
10-sinf “Biologiya” darsligining (1-nashr. “Sharq” NMAK - 2017) 20-betida “O‘simliklar quruq massasining 80%ga yaqini, hayvonlar quruq moddasi massasining 2%ga yaqinini uglevodlar tashkil etadi” deb yozilgan. Xuddi shu darslikning rus tilidagi nashrida bu ma’lumot: “Soderjaniye uglevodov v jivotnix sostavlyayet 1-5%, a v nekotorix rastitelnix kletkax mojet dostigat do 90%”, deb berilgan.
Partiyaning fan-ta’lim masalalari bo‘yicha jamoatchilik ekspertlar guruhi tomonidan yuqoridagi kabi kamchiliklarga qo‘l qo‘ymaslik maqsadida barcha darsliklarni hukumat doirasida ekspertizadan o‘tkazish taklifi bildirilgan.
Izoh (0)