Shavkat Mirziyoyev Qarshi shahrida barpo etilgan “Vatanparvarlar” bog‘ini borib ko‘rdi. Bu haqda Prezident matbuot xizmati xabar bermoqda.
Bu majmua davlat rahbarining viloyatga avvalgi tashrifida bergan ko‘rsatmasiga muvofiq vatanparvarlik ruhida rekonstruksiya qilingan.
Qariyb 7 gektar hudud obodonlashtirib, muzey va blendaj qurilgan. Ikkinchi jahon urushida mardonavor jang qilgan vatandoshlarimiz xotirasi jonlantirilgan. Muzey atrofida tarixiy harbiy texnikalar joylashtirilgan.
Bog‘ markazida O‘zbekiston milliy xaritasining ulkan maketi joylashtirilgan. Unda har bir viloyatning buyuk siymolari, qadimiy obidalari, serviqor tog‘lari, hududidan oqib o‘tuvchi daryolari, bepoyon kengliklarigacha aks ettirilgan.
Bog‘dagi sun’iy ko‘l, amfiteatr, o‘q otish va qoyaga chiqish joylari yoshlarning vaqtini mazmunli o‘tkazish, salomatligini mustahkamlashga yordam beradi.
Prezident bog‘dagi sharoitlarni ko‘zdan kechirdi, ta’lim muassasalaridagi “Jasorat” guruhlari a’zolari bilan suhbatlashdi.
— Bunday maskanlar yoshlarga xalq tarixi, ma’naviyati va madaniyati haqida yaqqol taassurot beradi. Endi bundan samarali foydalanish, bu yerga yoshlarni ko‘proq olib kelib, ochiq darslar o‘tkazish kerak, — dedi Shavkat Mirziyoyev.
O‘zbekistonning Ikkinchi jahon urushidagi g‘alabaga qo‘shgan hissasini yoshlarga yetkazish, tinchlik-osoyishtalik uchun katta xizmatlar qilgan vatandoshlar haqida so‘zlab berish zarurligi ta’kidlandi.
Izoh (0)