Toshkent harbiy okrugining “Chirchiq” dala-o‘quv maydonida 25-noyabrdan 28-noyabrga qadar davlat va xo‘jalik boshqaruvi organlari rahbarlari ishtirokida yig‘in o‘tkazildi. Bu haqda Mudofaa vazirligi matbuot xizmati xabar berdi.
Eslatib o‘tamiz, davlat organlari, fuqarolarning o‘zini-o‘zi boshqarish organlari, korxona, muassasa, tashkilotlar katta-kichik rahbarlarining mudofaa sohasidagi ishtirokiga O‘zbekiston Prezidenti 2017-yili Samarqandda o‘tkazilgan videoselektor yig‘ilishida tanqidiy baho bergandi.
Muammoga yechim sifatida 2017-yil 12-dekabrda O‘zbekiston Prezidentining harbiy-ma’muriy sektorlar xususida farmoni imzolagan edi. Bo‘lib o‘tgan yig‘in shu ma’noda ham muhim va dolzarb hisoblanadi.
O‘zbekiston Prezidentining farmoyishiga ko‘ra, joriy yildan boshlab Mudofaa vazirligining harbiy qismlarida davlat va xo‘jalik boshqaruvi organlari, mahalliy davlat hokimiyati organlari va boshqa davlat tashkilotlari rahbarlarining yillik yig‘ilishi o‘tkazilishi belgilandi.
Farmoyishda ta’kidlanishicha, qisqa muddat ichida davlat va xo‘jalik boshqaruvi organlari, mahalliy boshqaruv organlari va boshqa davlat tashkilotlari tomonidan mamlakat mudofaa qobiliyatini takomillashtirishga qaratilgan katta ishlar amalga oshirilgan. Qurolli Kuchlar faoliyatining ochiqligini ta’minlash, mamlakat mudofaa sohasida davlat siyosatini shakllantirishda fuqarolik va nodavlat notijorat institutlar, boshqa tashkilotlarni keng jalb qilishning samarali mexanizmlari ishlab chiqildi va amalga oshirilmoqda.
O‘tkazilgan yig‘inda vazirlar, ularning o‘rinbosarlari, hokimlar va boshqa darajadagi rahbarlarga mintaqadagi harbiy-siyosiy vaziyatdan kelib chiqadigan vazifalar bo‘yicha ma’ruzalar o‘qildi.
Shuningdek, malakali harbiy mutaxassislar mamlakat mudofaa salohiyatini oshirishda zarur bo‘lgan ko‘plab yo‘nalishlar bo‘yicha chiqishlar qildi. Amaliy harbiy mashg‘ulotlar, milliy armiyamiz qurol-aslahasi, harbiy texnika namoyishida ishtirok etdi. Xullas, rahbar xodimlar poligonda, harbiy hayot ichida to‘rt kun yashab, nazariy va amaliy mashg‘ulotlarni kuzatdi, turli qurol namunalaridan amalda o‘q otishdi.
Bugun, 28-noyabr kuni ertalab O‘zbekiston mudofaa vaziri general-mayor Abdusalom Azizov yig‘in yopilishiga bag‘ishlangan tadbirda ishtirokchilarga tantanali ravishda sertifikatlar topshirdi.
Izoh (0)