Joriy yilning 25-noyabridan – 25-dekabriga qadar respublikada “Kuz-qish mavsumida sodir bo‘lishi mumkin bo‘lgan favqulodda vaziyatlarning oldini olish oyligi” boshlandi. Bu haqda O‘zA xabar bermoqda.
Toshkent shahar hokimligi matbuot xizmati xabar qilishicha, mazkur oylik is gazi hamda qarovsiz qoldirilgan hayvonlardan quturish kasalligi yuqishining oldini olishga qaratilgan. Olingan ma’lumotlarga ko‘ra, is gazidan zaharlanish holatlari ko‘proq kuzatilmoqda. Sababi qishki mavsum boshlanishi bilan fuqarolar xonadonlarni isitish masalasida har doim ham qoidaga rioya etishavermaydi.
Tahlil natijasiga ko‘ra is gazidan zaharlanishning asosiy sabablarini qo‘lbola isitish vositalaridan foydalanish, texnika va yong‘in xavfsizligi qoidalariga rioya etmaslik, sertifikatlanmagan xorijiy isitish moslamalaridan foydalanish, bolalarni qarovsiz qoldirish, yopiq binolarda ko‘mir va o‘tinlarni yoqish hamda nosoz o‘rnatilgan mo‘rikon kabilar tashkil etmoqda.
Oylik davomida va keyinchalik savollar, fikrlar va takliflar hamda e’tirozlar uchun Toshkent shahar Favqulodda vaziyatlar boshqarmasi o‘zining “Tezkor raqami”ni ishga tushirdi. (71) 245-90-50 yoki 1050 qisqa raqamiga tun-u kun murojaat qilishingiz va malakali mutaxassislardan kerakli yordam va maslahatni olishingiz mumkin.
Izoh (0)