Innovatsion rivojlanish vaziri o‘rinbosari Oybek Norinboyev Tara Sharofudin boshchiligidagi Jahon banki vakillarini qabul qildi. Bu haqda “Daryo”ga vazirlik matbuot xizmati xabar berdi.
Tara Sharofudin missiyaning asosiy maqsadi haqida gapirib berdi. Bu JSDF (Yaponiya ijtimoiy rivojlanish jamg‘armasi) granti orqali moliyalashtirilishi taklif etilayotgan qishloq ayollarining iqtisodiy huquqlari va imkoniyatlarini kengaytirish bo‘yicha pilot loyihasini ishlab chiqish uchun maslahat uchrashuvlari uyushtirishdir.
Maslahat uchrashuvlari Jizzax va Qashqadaryo viloyatlarida asosiy manfaatdor tomonlar, jumladan, O‘zbekiston xotin-qizlar qo‘mitasi, Savdo-sanoat palatasi, hokimliklar, ilmiy-ishlab chiqarish muassasalari va qishloq ayollari vakillari ishtirokida bo‘lib o‘tadi.
Shuningdek, delegatsiya a’zolari Hindiston va Ozarbayjon misolida “Aqlli qishloq” loyihasi to‘g‘risida so‘zlab berdi. Hindistonda bu loyiha Microsoft kompaniyasi bilan hamkorlikda amalga oshirilgan bo‘lib, uning doirasida qishloqlar internet, uyali aloqaga ulangan, ijtimoiy masalalar hal qilingan.
Ozarbayjonda esa loyihani Jahon banki moliyalashtirgan bo‘lib, unda tadbirkorlik uchun mahalliy dastur ishlab chiqilgan, qishloq ayollari o‘z tadbirkorlik faoliyatlari borasida amaliy hamkorlikni yo‘lga qo‘yishi uchun imkoniyat beradigan biznes-inkubator yaratilgan. Mazkur loyihalar O‘zbekiston sharoitida joriy etish uchun namuna bo‘lib xizmat qilishi mumkinligi ta’kidlandi.
Uchrashuv natijalariga ko‘ra, tomonlar O‘zbekistonda ham “Aqlli qishloq” loyihasini joriy qilish masalalarini muhokama qildi.
Izoh (0)