O‘zbekiston Respublikasi Oliy Majlisi Qonunchilik palatasi Fuqarolar sog‘lig‘ini saqlash masalalari qo‘mitasi tomonidan O‘zbekiston Prezidentining 2018-yil 25-yanvardagi qarori bilan tasdiqlangan “2018-yilda O‘zbekiston Respublikasida OIV infeksiyasi tarqalishiga qarshi kurashish Davlat dasturi” ijrosi yuzasidan Respublika OITSga qarshi kurash markazi direktorining axborotini eshitishga bag‘ishlangan yig‘ilish bo‘lib o‘tdi. Bu haqda O‘zA xabar berdi.
Unda mamlakatda OIV infeksiyasi bilan kasallanish holati va xastalik tarqalishining oldini olish borasida Davlat dasturida belgilangan vazifalarning ijrosi bo‘yicha amalga oshirilayotgan ishlar, qarorda nazarda tutilgan chora-tadbirlarning so‘zsiz, o‘z vaqtida va sifatli ijro etilishini ta’minlash yuzasidan ko‘rilayotgan choralar, mavjud muammolar hamda kelgusidagi rejalar atroflicha muhokama qilindi.
Ta’kidlanganidek, BMTning OIV/OITS bo‘yicha dasturi (YuNEYDS) ma’lumotiga ko‘ra, dunyo bo‘yicha ayni paytda 37 milliondan ortiq OIV infeksiyasi bilan yashayotgan shaxs hisobga olingan. Respublikada 2018-yilning 1-yanvar holatiga ko‘ra, 37 872 nafar shaxs OIV infeksiyasini yuqtirgan.
Mamlakatda mazkur infeksiya tarqalishiga qarshi kurash samaradorligini oshirishga doir qo‘shimcha chora-tadbirlar izchillik bilan amalga oshirilishi natijasida keyingi yillarda bu boradagi epidemik vaziyat biroz barqarorlashgan. Ushbu infeksiya bilan kasallanganlar soni 2017-yilda 2013-yilga nisbatan 222 nafarga (5 foiz) kamaygan.
Markaz rahbarining axborotida qayd etilganidek, so‘nggi yillarda aholining ixtiyoriy ravishda va ma’lum guruhlarni qonun hujjatlari asosida majburiy ravishda laboratoriya tekshiruvlari bilan qamrab olish ko‘rsatkichlari ortdi.
2018-yilning 1-iyulidan boshlab OIV diagnostikasi bilan shug‘ullanuvchi 63 ta tumanlararo OIV diagnostik laboratoriya OITSga qarshi kurash markazlari tasarrufiga o‘tkazildi. Joriy yilning o‘tgan davrida OITSga qarshi kurash markazlari tomonidan mahalliy mablag‘lar va byudjetdan tashqari mablag‘lar hisobiga jami 1,4 milliard so‘mga 9 turdagi 34 ta asbob-uskuna sotib olib, o‘rnatildi.
Shuningdek, O‘zbekiston Respublikasi Fanlar akademiyasining O‘simlik moddalari kimyosi institutida OIV, gepatit B va C diagnostikasi uchun IFA test-sistemalar hamda O‘zbekiston Respublikasi Fanlar akademiyasi Fizika instituti qoshidagi “Radiopreparat” davlat korxonasida test-sistema va diagnostikumlar ishlab chiqarish yo‘lga qo‘yildi.
Yig‘ilishda OIV infeksiyasi masalalari bo‘yicha aholining xabardorligini oshirish borasida amalga oshirilgan ishlarga ham alohida to‘xtalib o‘tildi. Xususan, o‘rta ta’lim maktablarida OIV infeksiyasi mavzulari maktab o‘quvchilari uchun “Salomatlik darslari” va “Sog‘lom avlod asoslari” o‘quv dasturlari doirasida fanlar tarkibida integratsiyalashgan holda o‘qitilmoqda. Oliy va o‘rta maxsus ta’lim vazirligi bilan hamkorlikda tuzilgan rejaga muvofiq, yoshlar o‘rtasida OIV infeksiyasi profilaktikasi masalalarida 20 ta oliy o‘quv yurtida ma’ruzalar o‘qildi. O‘zbekiston Respublikasi Ichki ishlar vazirligi tomonidan OIV infeksiyasining profilaktikasi bo‘yicha soha “yo‘l xaritasi” tasdiqlanib, amaliyotga tatbiq etildi.
Shu bilan birgalikda, yig‘ilishda mazkur yo‘nalishda mavjud muammolar ham atroflicha muhokama qilindi. Jumladan, OIV infeksiyasi diagnostikasida va bemorlarni davolashda ishlatiladigan diagnostikumlar, test-sistemalar va reagentlar uzluksizligini ta’minlash, laboratoriyadagi mavjud asbob-uskunalarni ta’mirlash va har yili metrologik ko‘rikdan o‘tkazish uchun ajratiladigan mablag‘larning yetarli emasligi, tumanlararo OIV diagnostik laboratoriyalari joylashgan binolar ta’mirtalab holatga kelib qolgani, tegishli loyihalarni amalga oshirishda NNT ishtiroki talab darajasida tashkil etilmayotgani kabi vazifalarga yetarli e’tibor qaratilmayapti.
Yig‘ilish davomida muhokama etilgan masalalar yuzasidan takliflar ishlab chiqilib, vazifalar belgilab olindi.
Izoh (0)