Samarqand shahrida 22—23-noyabr kunlari Inson huquqlari bo‘yicha birinchi Osiyo forumi bo‘lib o‘tdi. Prezident Shavkat Mirziyoyev tashabbusi bilan tashkil etilgan mazkur forum inson erki va qadr-qimmatini ulug‘lash, huquqlari poymol etilishiga yo‘l qo‘ymaslikka qaratilgan ijtimoiy va global ahamiyatga ega yirik tadbir sifatida dunyo hamjamiyati tomonidan e’tirof etilmoqda, deb yozmoqda O‘zA.
Xususan, qator xalqaro tashkilotlar, ommaviy axborot vositalarida Osiyo forumi haqida ko‘plab materiallar e’lon qilindi.
YXHTning qator tuzilmalari anjumanda faol ishtirok etdi. Ushbu tashkilotning internet saytida e’lon qilingan maqolada bunday katta delegatsiyaning Samarqandga tashrifi tadbirning muhim ahamiyatga ega ekani bilan izohlanishi ta’kidlanadi.
Maqolada qayd etilganidek, O‘zbekiston tashabbusi bilan o‘tkazilgan forum, unda 400 ga yaqin ishtirokchi qatnashishi inson huquqlari sohasida O‘zbekistonda olib borilayotgan islohotlarning samarasi hisoblanadi.
Shanxay hamkorlik tashkilotining “InfoSHOS” portali sahifalarida ham forumning ahamiyati, anjuman tafsilotlariga bag‘ishlangan maqola joylashtirildi. Xabarda tadbirning xalqaro ahamiyatga ega ekani, unda BMT, YXHT, YI, IHT, shuningdek, qator davlatlar parlamentlari delegatsiyalari, inson huquqlar bo‘yicha milliy institutlar rahbarlari va boshqa xalqaro va mintaqaviy tashkilotlar vakillari ishtirok etgani buning tasdig‘i ekani alohida qayd etiladi.
MDH Ijroiya qo‘mitasi rasmiy sayti sahifalarida ham Samarqand forumi tafsilotlariga alohida e’tibor qaratilgan.
Jumladan, forumga bag‘ishlangan maqolada shunday deyiladi: “Inson huquqlari umumjahon deklaratsiyasi MDH tashkilotining shartnomaviy bazasini shakllantirishda muhim ahamiyatga ega. Zero, ushbu hujjat, inson huquqlarini himoya qilish sohasidagi amaliyotni belgilovchi asosdir. Deklaratsiyaning 70 yilligiga bag‘ishlangan forum xalqaro huquqqa rioya etilishini ta’minlash va bu boradagi hamkorlikni rivojlantirishda katta ahamiyatga ega”.
Belarus Respublikasining yetakchi axborot agentligi “BelTA”da forum haqida “Inson huquqlari bo‘yicha Osiyo forumi 22—23-noyabr kunlari Samarqandda o‘tkazildi” sarlavhali maqola chop etildi.
Unda anjumanning inson huquqlarini ta’minlashdagi ahamiyati, konferensiyada ko‘rilgan mavzular haqida ma’lumotlar keltirilgan.
Qirg‘iziston milliy axborot agentligi “Kabar”da nashr etilgan maqolada Inson huquqlari bo‘yicha Osiyo forumini O‘zbekistonda o‘tkazish tashabbusi 2017-yilda Prezident Shavkat Mirziyoyev tomonidan ilgari surilgani qayd etiladi.
Shuningdek, O‘zbekistonning inson huquqlarini ta’minlash borasidagi sa’y-harakatlari, so‘nggi yillardagi intilish va xalqaro hamkorlikdagi dasturlari haqida ma’lumotlar keltiriladi.
“Prezident Shavkat Mirziyoyevning BMT Inson huquqlari bo‘yicha Oliy komissari Zayd Raad al-Husayn bilan uchrashuvi, qolaversa, Oliy komissarning O‘zbekistonga tashrifi yakunlari bo‘yicha qabul qilingan harakatlar rejasi O‘zbekistonning inson sha’ni va erkinligini himoya qilish yo‘lidagi hamkorlik yo‘nalishini belgilab berdi“, — deyiladi xabarda.
Ozarbayjonning “Trend.Az“ axborot agentligi muxbiri Fikret Doluxanovning Inson huquqlari bo‘yicha Osiyo forumi doirasida tashkil qilingan uchrashuvlar haqidagi maqolasi ham eng ko‘p o‘qilgan xabarlar ro‘yxatidan o‘rin olganini qayd etish joiz.
Muallif bugungi kunda O‘zbekistonning jahon hamjamiyati bilan shitob bilan rivojlanib borayotgan hamkorlik aloqalari, xususan, O‘zbekiston bilan BMT munosabatlari haqida fikr bildiradi.
“Birlashgan Millatlar Tashkiloti O‘zbekiston bilan ko‘p qirrali hamkorlikni, jumladan, Samarqandda o‘tgan Inson huquqlari bo‘yicha Osiyo forumida erishilgan natijalarni amalga oshirishda sheriklirni yanada chuqurlashtirishga tayyor ekanini qayd etdi”, — deyiladi xabarda.
Izoh (0)