Joriy yilning 10-dekabr kuni “Media-Xoll NAESMI” (“Zarafshon” konsert zali)da X ijtimoiy media-mahsulotlar milliy festivali bo‘lib o‘tadi. Festival “O‘zbekiston madaniy merosi dunyo to‘plamlarida” loyihasining yillik hisobotiga bag‘ishlangan multimedia-forumi doirasida tashkil etiladi. Bu haqda “Daryo”ga NAESMI matbuot xizmati ma’lum qildi.
Festival O‘zbekiston elektron ommaviy axborot vositalari milliy assotsiatsiyasi, Oliy Majlis huzuridagi nodavlat-notijorat tashkilotlari va fuqarolik jamiyatining boshqa institutlarini qo‘llab-quvvatlash jamoat fondi mablag‘larini boshqarish bo‘yicha Parlament komissiyasi, Turizmni rivojlantirish qo‘mitasi hamda YuNЕSKO tomonidan tashkil etilmoqda.
Tadbirni o‘tkazishdan asosiy maqsad mahalliy va xorijiy ommaviy axborot vositalari, televideniye va kino ijodkorlari, faol jurnalistlar va bloggerlarning faoliyatini rag‘batlantirish, ommaviy axborot vositalarida mamlakat madaniy-tarixiy merosiga oid mavzularini yoritish va O‘zbekiston sayyohlik salohiyatini oshirishga qaratilgan.
Festivalda mahalliy va xorijiy ommaviy axborot vositalari vakillari, media sohasi rahbarlari, bloggerlar, kinematogroflar, prodyuserlar hamda ijodiy guruhlar ishtirok etadi. Festival mehmonlari sifatida taniqli mahalliy va xorijiy olimlar, davlat va jamoat tashkilotlari vakillari, madaniyat va san’at namoyandalari, sayyohlik kompaniyalari vakillari va sohaga doir boshqa vakillar taklif etiladi.
Eng yaxshi media-mahsulotni aniqlash uchun festival tashkiliy qo‘mitasi va hakamlar hay’ati tuziladi. G‘oliblar bir qator nominatsiyalarda asosiy va rag‘batlantiruvchi mukofotlar bilan taqdirlanadi.
Saralash bosqichining yakunida ekspertlar guruhi tomonidan 4 ta nominatsiya bo‘yicha 12 ta televideniye va radiostansiya tanlab olinadi. G‘oliblar to‘g‘ridan-to‘g‘ri onlayn ovoz berish orqali aniqlanadi.
Festival quyidagi nominatsiyalarda o‘tkaziladi: “O‘zbekiston — turistik maskan, “Mazali O‘zbekiston “O‘zbekiston madaniyat maskani” va “Qadimiy O‘zbekiston”.Tashkiliy qo‘mita g‘oliblarni, shuningdek, telekanallarda efirga uzatiladigan maxsus Gran-pri mavzuli ishlarni taqdirlashni rejalashtirmoqda.
Eng yaxshi roliklar mualliflari X Ijtimoiy media-mahsulotlar milliy festivalining qimmatbaho sovg‘alari va esdalik diplomlari bilan taqdirlanadi. Bundan tashqari, tashkiliy qo‘mita tomonidan boshqa yo‘nalishdagi roliklar uchun maxsus diplom va maxsus nominatsiyalar ta’sis etiladi.
“Biz maxsus asosiy mukofotlarni ta’sis etdik, — deydi festival hakamlar hay’ati raisi, Bosh vazir o‘rinbosari Aziz Abduhakimov. — Eng yaxshi telerolik uchun g‘olib bo‘lgan ishtirokchi Spark avtomobiliga ega bo‘ladi. Tanlovda g‘olib bo‘lgan xorijlik ishtirokchilar uchun asosiy sovrin VIP-tur — O‘zbekistonning o‘rganilmagan, sirli va muqaddas joylariga tashrif buyurish imkoniyati yaratiladi”.
Izoh (0)