Toshkent viloyatida chegarani noqonuniy kesib o‘tmoqchi bo‘lgan fuqaro jazoga tortildi

Yaqinda jinoyat ishlari bo‘yicha Toshkent tumani sudining tumandagi “Sohibkor” ma­hal­la fuqarolar yig‘inidagi ochiq sud majlisida Bo‘ka tumanida yashaydigan Rustamali Ermatovning ishi ko‘rib chiqildi. Qozog‘iston Respublikasiga borib ishlashni niyat qilgan fuqaro jinoiy qilmishi uchun qonun oldida javob berdi. Bu haqda jinoyat ishlari bo‘yicha Toshkent tumani sudining raisi Mirali Mirrahimovga tayanib, “Gazeta.uz” xabar berdi.

Joriy yilning 7-sentabr kuni qonuniy ravishda Qozog‘is­ton Respublikasi hududiga o‘t­gan R. Ermatov Chimkentdagi bog‘da, Ixtiyor ism­li yigitning qo‘­lida yollanma ishchi sifatida ishlay boshlaydi.

Qisqasi, bog‘da turli xil yumushlarni bajarib yurgan Rustamali Ixtiyor bilan kelisholmay qoladi. Shunda Ixtiyorning tanishi Shavkat uning fu­qarolik pasportini olib qo‘yadi. Rustamali qo‘­lida fuqarolik pasporti bo‘l­masa-da, O‘zbekistonga qaytish harakatiga tushadi va 11-sentabr kuni soat 22:30 atrofida “G‘isht ko‘prik” chegara pos­ti yaqinidagi tikanli simlar orasidan noqonuniy ravishda O‘zbekiston Respublikasi hududiga o‘tayotganida chegarachilar tomonidan qo‘lga olinadi.

Bunday xatti-harakat Rustamali Ermatovga qimmatga tushdi. U eng kam oylik ish haqining yetti baravari, ya’ni bir million ikki yuz to‘qson ming so‘m jarima to‘laydigan bo‘l­di.