Жорий йилнинг 10 декабрь куни «Медиа-Холл НАЭСМИ» («Зарафшон» концерт зали)да Х ижтимоий медиа-маҳсулотлар миллий фестивали бўлиб ўтади. Фестиваль «Ўзбекистон маданий мероси дунё тўпламларида» лойиҳасининг йиллик ҳисоботига бағишланган мультимедиа-форуми доирасида ташкил этилади. Бу ҳақда «Дарё»га НАЭСМИ матбуот хизмати маълум қилди.
Фестиваль Ўзбекистон электрон оммавий ахборот воситалари миллий ассоциацияси, Олий Мажлис ҳузуридаги нодавлат-нотижорат ташкилотлари ва фуқаролик жамиятининг бошқа институтларини қўллаб-қувватлаш жамоат фонди маблағларини бошқариш бўйича Парламент комиссияси, Туризмни ривожлантириш қўмитаси ҳамда ЮНЕСКО томонидан ташкил этилмоқда.
Тадбирни ўтказишдан асосий мақсад маҳаллий ва хорижий оммавий ахборот воситалари, телевидение ва кино ижодкорлари, фаол журналистлар ва блоггерларнинг фаолиятини рағбатлантириш, оммавий ахборот воситаларида мамлакат маданий-тарихий меросига оид мавзуларини ёритиш ва Ўзбекистон сайёҳлик салоҳиятини оширишга қаратилган.
Фестивальда маҳаллий ва хорижий оммавий ахборот воситалари вакиллари, медиа соҳаси раҳбарлари, блоггерлар, кинематогрофлар, продюсерлар ҳамда ижодий гуруҳлар иштирок этади. Фестиваль меҳмонлари сифатида таниқли маҳаллий ва хорижий олимлар, давлат ва жамоат ташкилотлари вакиллари, маданият ва санъат намояндалари, сайёҳлик компаниялари вакиллари ва соҳага доир бошқа вакиллар таклиф этилади.
Энг яхши медиа-маҳсулотни аниқлаш учун фестиваль ташкилий қўмитаси ва ҳакамлар ҳайъати тузилади. Ғолиблар бир қатор номинацияларда асосий ва рағбатлантирувчи мукофотлар билан тақдирланади.
Саралаш босқичининг якунида экспертлар гуруҳи томонидан 4 та номинация бўйича 12 та телевидение ва радиостанция танлаб олинади. Ғолиблар тўғридан-тўғри онлайн овоз бериш орқали аниқланади.
Фестиваль қуйидаги номинацияларда ўтказилади: «Ўзбекистон — туристик маскан, «Мазали Ўзбекистон «Ўзбекистон маданият маскани» ва «Қадимий Ўзбекистон».Ташкилий қўмита ғолибларни, шунингдек, телеканалларда эфирга узатиладиган махсус Гран-при мавзули ишларни тақдирлашни режалаштирмоқда.
Энг яхши роликлар муаллифлари Х Ижтимоий медиа-маҳсулотлар миллий фестивалининг қимматбаҳо совғалари ва эсдалик дипломлари билан тақдирланади. Бундан ташқари, ташкилий қўмита томонидан бошқа йўналишдаги роликлар учун махсус диплом ва махсус номинациялар таъсис этилади.
«Биз махсус асосий мукофотларни таъсис этдик, — дейди фестиваль ҳакамлар ҳайъати раиси, Бош вазир ўринбосари Азиз Абдуҳакимов. — Энг яхши телеролик учун ғолиб бўлган иштирокчи Spark автомобилига эга бўлади. Танловда ғолиб бўлган хорижлик иштирокчилар учун асосий соврин VIP-тур — Ўзбекистоннинг ўрганилмаган, сирли ва муқаддас жойларига ташриф буюриш имконияти яратилади».
Изоҳ (0)