Navoiyning betakror go‘shalaridan bo‘lgan Konimex tumanidan 250 kilometr uzoqlikda joylashgan Xolmurod ovulida hayot qizg‘in. Inson qo‘li qanchalar gul ekanligini, uning aql-zakovatiga bu yerga bir bor kelib ko‘rgan kishi amin bo‘ladi, deb yozadi O‘zA.
Qum ko‘chkilarida, saratonning issig‘ida kecha-kunduz mehnat qilib, rohat topayotgan, 130 ta xonadondan ortiq xolmurodliklar farzandlarining kelajagi, ertasi uchun ham tinim bilmay harakat qiladi.
Xususan, 149 nafar o‘quvchi ta’lim olayotgan hududdagi 25-umumta’lim maktabi, unda jon kuydirib faoliyat yuritib borayotgan boshlang‘ich tashkilot yetakchisi Valixon Ikromov bunga isbotidir, deyiladi agentlik xabarida.
O‘zA tomonidan mazkur yetakchining kasbiy va shaxsiy hayoti haqida tayyorlangan maqola to‘laligicha taqdim etiladi.
“Maktabimiz qozoq tiliga ixtisoslashtirilgan bo‘lib, barcha imoniyatlarimiz yashash sharoitimizdan kelib chiqqan holda yaratilgan. To‘g‘ri, ba’zi bir kamchiliklar bundan mustasno. Lekin shunda ham bizning bilimga chanqoq yoshlarimiz o‘z iqtidorlari-yu iste’dodlarini namoyon qilib kelmoqda, — deydi qahramonimiz Valixon. — Jumladan, 10-sinfda tahsil olayotgan Aliya To‘rishova Qozog‘istonda 7 davlat o‘rtasida o‘tkazilgan qozoq tili va adabiyoti fan olimpiadasida faxrli o‘rinni qo‘lga kiritib, kumush medal sohibi bo‘ldi. Muhimi, bizning ovul yoshlari serg‘ayrat, intiluvchan”.
Darhaqiqat, bu yerdagi yoshlar chindan o‘z maqsadlari sari dadil qadam tashlayapti. Chunki ular qalbi beminnat quyosh taftidek qaynoq, sahro kengliklaridek bepayon. Xususan, Valixon Ikromov ham bugunning ishonchli yoshlaridan. Bir paytning o‘zida O‘zbekiston yoshlar ittifoqining boshlang‘ich tashkiloti yetakchisi, shuningdek, chorvador. Ayni paytda, chorvachilik, yilqichilik hamda tuyachilik bilan faoliyat yuritayotgan qahramonimizning faoliyati, oilasini ko‘rib havasimiz keldi. Turmush o‘rtog‘i Guljazira bilan nafaqat 2 nafar shirin-shakar farzandi, qolaversa, ovulning barcha bolalari ta’lim-tarbiyasiga kirishgan. 26 yoshda cho‘lu biyobonni shunday obod qilayotgan yoshlar borligi bizga faxr tuyg‘ularini baxsh etadi.
“Bizning xolmurodliklar shunaqa mehnatkash. Ko‘rib turganingizdek, barcha hayot uchun kurashib, kelajagi uchun harakatda. Biz ham turmush o‘rtog‘im bilan maktab faoliyatidan tashqari chorvachilik bilan shug‘ullanayapmiz. Ikkimiz ham o‘qituvchimiz. Kasbimizdan faxrlanamiz. Qachonki, inson o‘zi bajarayotgan yumushdan zavq topa olsa, uning qiyinchiliklari bilinmaydi. Yoshlar bilan ishlash menga zavq bag‘ishlaydi. Tuyachilik bilan ancha yillardan buyon shug‘ullanib kelamiz. O‘zimizga yarasha fermer xo‘jaligimiz bor. Ovulimizda mana shunaqa hayot qaynoq. Lekin hech qachon afsuslanmaymiz. Muhimi, vaqtimiz bekorga o‘tmayapti. Daromadimdan Yoshlar ittifoqi nomidan yoshlarni qo‘llab-quvvatlashga harakat qilaman. Tashkilotimiz atrofida o‘quvchilarni to‘liq birlashtirganman. Maqsadimiz, ovulimizda katta bo‘layotgan bolalar imkon qadar kamlik neligini ko‘rmasligi kerak. Umrimiz mazmunli, hayotimiz fayzli”, — deydi Yoshlar yetakchisi.
Izoh (0)