“Xalq so‘zi” Qashqadaryo viloyatining Qamashi tumanida joylashgan 42-umumiy o‘rta ta’lim maktabi haqida tanqidiy maqola e’lon qildi. Ta’kidlanishicha, 2002-yilda qurilgan zamonaviy maktab binosidagi isitish tizimlari hali biror marta ishlamagan.
“Sinflarimizni isitish masalasi har yili muammo bo‘ladi, chunki, isitish batareyalar maktab qurilganidan buyon ishlamaydi. Bir amallab, qora pech bilan o‘tin, ko‘mir yoqib ilitamiz, lekin, sinfni dud bosib ketadi. Maktabga berilayotgan ko‘mir yoqilg‘isi o‘ta sifatsiz”, — deyishadi o‘qituvchilar Zamira Xudoynazarova, Munavvar Mamatova, Nasiba Ibrohimova bir ovozdan.
“Sinflarning sovuqligi tufayli ko‘pchilik o‘qituvchilarimiz oyoq og‘riq,bel og‘riq bo‘lishgan. Buni hatto, sovuqda diydirab o‘tiradigan bolalarimiz ham insholarida yozyapti. O‘quvchi qizlarimizdan biri biri o‘z inshosida “O‘qituvchi bo‘lishni juda ham xohlayman. Lekin o‘qituvchi sovuqqa chidamli bo‘lishi kerak”, deb yozibdi. Darsda bolalar ham, o‘qituvchilar ham qish kiyimida o‘tirgandan keyin bunday fikrlar yuzaga kelishi tabiiy, albatta”, — deb so‘zlarini davom ettiradi Z. Xudoynazarova.
Bu hammasi emas, maktab oldida har payshanba kuni bozor bo‘ladi. Bu esa dars mashg‘ulotlari, bolalarning o‘qishiga salbiy ta’sir o‘tkazmoqda. Ular tanaffusda chiqib ketib, bozordan kelmay qoladi. Aholining va mashinalarning bu yerda to‘planishi, mashinalarning tartibsiz harakati o‘quvchi va o‘qituvchilarga xalal bermoqda. Bozorni ko‘chirish haqda bir necha bor aytganmiz. Lekin qariyb 30 yildan oshiq bo‘ladiki, bozor shu yerda.
Maktab o‘qituvchilarining ta’kidlashicha 460 o‘rinli ta’lim muassasasida 1387 nafar o‘quvchi o‘qiydi. Sinfxonalar yetishmasligi tufayli birsinfda 35-40 tagacha o‘quvchi o‘tirishga majbur bo‘lmoqda. Bolalar 5 kilometr uzoqlikdagi qishloqlardan o‘qishga keladi. Aksariyati qish kunlari qorong‘uda qolib ketishadi. Xalq ta’limi bo‘limidan faqat tekshirish uchun kelishadi, xolos. Hech kim yordam beray demaydi.
Nashr muxbiri shu kuni maktab direktori Shuhrat To‘rayevni ham, o‘quv ishlari bo‘yicha direktor o‘rinbosari Eshbo‘ri Tilovovni va xo‘jalik ishlari bo‘yicha mas’ul Rashid Ismoilovni ham uchrata olmagan. Ular dars mashg‘ulotlarida bo‘lganida davomatning qoniqarsiz ekanligiga guvoh bo‘lgan. O‘qituvchilar buni bolalarning tez-tez kasal bo‘lib qolishi bilan izohlagan.
“Darsga kelmagan o‘quvchilarimiz maktabdan 5 kilometr uzoqda joylashgan Sariq tosh qishlog‘idan va undan ham uzoq masofalardagi uylardan kelib o‘qishga majbur bo‘lishmoqda. Sariqtosh va Guliston qishloqlari oralig‘ida 96 o‘rinli maktab binosi qurilishi belgilangan edi, ammo, ushbu maktab dasturga kiritilganiga 2 yil bo‘lishiga qaramasdan hali qurilmadi”, — deydi matematika fani o‘qituvchisi Nodira Asadullayeva.
O‘qituvchilar maktabni markazlashgan holda qizitish uchun o‘rnatilgan qozonxonaning o‘tgan yili qayergadir olib ketilganini ta’kidlashdi. Qozonxona o‘rni esa ayanchli ahvolda yantoqxonaga aylantirib yuborilgan.
Izoh (0)