Навоийнинг бетакрор гўшаларидан бўлган Конимех туманидан 250 километр узоқликда жойлашган Холмурод овулида ҳаёт қизғин. Инсон қўли қанчалар гул эканлигини, унинг ақл-заковатига бу ерга бир бор келиб кўрган киши амин бўлади, деб ёзади ЎзА.
Қум кўчкиларида, саратоннинг иссиғида кеча-кундуз меҳнат қилиб, роҳат топаётган, 130 та хонадондан ортиқ холмуродликлар фарзандларининг келажаги, эртаси учун ҳам тиним билмай ҳаракат қилади.
Хусусан, 149 нафар ўқувчи таълим олаётган ҳудуддаги 25-умумтаълим мактаби, унда жон куйдириб фаолият юритиб бораётган бошланғич ташкилот етакчиси Валихон Икромов бунга исботидир, дейилади агентлик хабарида.
ЎзА томонидан мазкур етакчининг касбий ва шахсий ҳаёти ҳақида тайёрланган мақола тўлалигича тақдим этилади.
«Мактабимиз қозоқ тилига ихтисослаштирилган бўлиб, барча имониятларимиз яшаш шароитимиздан келиб чиққан ҳолда яратилган. Тўғри, баъзи бир камчиликлар бундан мустасно. Лекин шунда ҳам бизнинг билимга чанқоқ ёшларимиз ўз иқтидорлари-ю истеъдодларини намоён қилиб келмоқда, — дейди қаҳрамонимиз Валихон. — Жумладан, 10-синфда таҳсил олаётган Алия Тўришова Қозоғистонда 7 давлат ўртасида ўтказилган қозоқ тили ва адабиёти фан олимпиадасида фахрли ўринни қўлга киритиб, кумуш медаль соҳиби бўлди. Муҳими, бизнинг овул ёшлари серғайрат, интилувчан».
Дарҳақиқат, бу ердаги ёшлар чиндан ўз мақсадлари сари дадил қадам ташлаяпти. Чунки улар қалби беминнат қуёш тафтидек қайноқ, саҳро кенгликларидек бепаён. Хусусан, Валихон Икромов ҳам бугуннинг ишончли ёшларидан. Бир пайтнинг ўзида Ўзбекистон ёшлар иттифоқининг бошланғич ташкилоти етакчиси, шунингдек, чорвадор. Айни пайтда, чорвачилик, йилқичилик ҳамда туячилик билан фаолият юритаётган қаҳрамонимизнинг фаолияти, оиласини кўриб ҳавасимиз келди. Турмуш ўртоғи Гулжазира билан нафақат 2 нафар ширин-шакар фарзанди, қолаверса, овулнинг барча болалари таълим-тарбиясига киришган. 26 ёшда чўл-у биёбонни шундай обод қилаётган ёшлар борлиги бизга фахр туйғуларини бахш этади.
«Бизнинг холмуродликлар шунақа меҳнаткаш. Кўриб турганингиздек, барча ҳаёт учун курашиб, келажаги учун ҳаракатда. Биз ҳам турмуш ўртоғим билан мактаб фаолиятидан ташқари чорвачилик билан шуғулланаяпмиз. Иккимиз ҳам ўқитувчимиз. Касбимиздан фахрланамиз. Қачонки, инсон ўзи бажараётган юмушдан завқ топа олса, унинг қийинчиликлари билинмайди. Ёшлар билан ишлаш менга завқ бағишлайди. Туячилик билан анча йиллардан буён шуғулланиб келамиз. Ўзимизга яраша фермер хўжалигимиз бор. Овулимизда мана шунақа ҳаёт қайноқ. Лекин ҳеч қачон афсусланмаймиз. Муҳими, вақтимиз бекорга ўтмаяпти. Даромадимдан Ёшлар иттифоқи номидан ёшларни қўллаб-қувватлашга ҳаракат қиламан. Ташкилотимиз атрофида ўқувчиларни тўлиқ бирлаштирганман. Мақсадимиз, овулимизда катта бўлаётган болалар имкон қадар камлик нелигини кўрмаслиги керак. Умримиз мазмунли, ҳаётимиз файзли», — дейди Ёшлар етакчиси.
Изоҳ (0)