O‘zA viloyatlarning tuman gazetalari yildan-yilga o‘quvchilarini yo‘qotib borayotgani, moliyaviy ahvoli esa yaxshi emasligi haqida tanqidiy maqola e’lon qildi.
“Obuna masalasi doimgidek muammo. Odamlar gazetalardan uzoqlashmoqda, gazetalar esa odamlarning asl muammolaridan yiroqlashib ketgan. Jurnalistlar, gazetalar ahvolini yaxshilash uchun qaratilgan anjumanlarda asosan ularning xatolari, kamchiliklari eslanmoqda va tahririyatlarning haqiqiy ahvolidan uzoq bo‘lgan tavsiyalar berilmoqda”, — deyiladi maqolada.
6-noyabr kuni Toshkentdagi City Palace mehmonxonasida ana shunday anjumanlarning navbatdagisi o‘tkazilgan.
“O‘zbekiston mustaqil bosma OAV va axborot agentliklarini qo‘llab-quvvatlash jamoat fondi rahbari Said Abdulaziz Yusupov tanqidlar bilan birga nashrlarning moddiy ahvolini yaxshilash uchun tavsiyalar ham berdi. U tahririyatlar uchun kredit mablag‘ini ajratuvchi mediabank tashkil etishni taklif qildi. Kreditni olish o‘zi bir muammo, uni uzish esa...tushuntirishga qalam ojizlik qiladi. Stol atrofida yig‘ilib g‘arb tajribalari haqida gapirish naqadar oson. Chet-el tajribasi haqida gapirayotgan bo‘yinbog‘ taqqan mutasaddilar asli real vaziyat bilan tanishmikan? Jamoasi 6-10 kishidan iborat bo‘lgan ba’zi tahririyatlar marketing hamda kreditni yopish masalasi bilan shug‘ullanadimi yoki ijtimoiy hayotdagi muammolarni ko‘tarib chiqadimi? O‘zi boshdan oyoq muammoning o‘zi bo‘lgan tuman nashrlari bo‘yniga yana kredit muammosi og‘ir bo‘lmasmikan? Yana ulardan biz xalq dardini olib chiqishni kutamiz. Tahririyatlar qarzini uzaman deb bor 4 dona kompyuter va eski mebellaridan ham ajralib qolmaydimi?” — deyiladi maqolada.
Ekspert Beruniy Alimov hududiy nashrlar va qisman respublika gazetalarida ham ko‘zga tashlanayotgan kamchiliklarni sanab o‘tdi.
Uning fikricha, bugungi maqolalarda ortiqcha gaplar, emotsional bo‘yoqlar ko‘p. Jurnalistlar maqolada mutaxassis fikrini emas, ko‘proq o‘z pozitsiyasini ilgari suradi. Dolzarb bo‘lmagan mavzularda katta publitsistik maqolalar beriladi, internet saytlaridan materiallar to‘liq ko‘chirilib bosiladi, tadbirlarning press-relizlari to‘lig‘icha e’lon qilinadi. "Odamlarga tadbirlar emas, yangiliklar kerak", deydi mutaxassis. Umuman olganda, kamchiliklar ko‘p, yangilanishlar esa oz.
“Anjumanda mutaxassislar mavjud kamchiliklarni sanab o‘tdi, mutasaddilar tanqidlarni ayamadi. Avvalgi anjumanlarda aytilgani kabi yana xorij tajribalari gapirildi, gazetalarga yangicha ishlash prinsiplari o‘rgatildi. Biroq, xorijdagi sharoitga ega bo‘lmagan tahririyatlarga ularning yo‘lini o‘rgatishdan naf bormikan? Bu xuddi raketani ko‘rmagan odamga uni boshqarishni o‘rgatishga o‘xshaydi. Uzoqdan kelgan hamkasblarimiz biroz yangilik va tajriba olgan holda yana o‘z qorong‘i xonalariga, o‘z muammolariga qaytib ketdilar”, — deya yakunlanadi maqola.
Izoh (0)