Fanlar akademiyasi Yahyo G‘ulomov nomidagi arxeologik tadqiqotlar instituti olimlari bilan Fransiya ilmiy markazlari va universitetlari hamkorligida amalga oshirilayotgan ilmiy loyihalar o‘z samarasini bermoqda. Bu haqda O‘zA ma’lum qildi.
Mazkur loyihalar doirasida Shahrisabz shahri, Samarqand, Buxoro, Surxondaryo viloyatlarida turli davrlarga oid arxeologik yodgorliklar o‘rganilib, bu qadimiy go‘shalarning hali fanga noma’lum qirralari kashf etilmoqda.
Surxondaryo viloyatida arxeologik tadqiqot ishlari olib borayotgan “O‘zbek-Fransuz-Baqtriya” ilmiy ekspeditsiyasi faoliyatiga 24 yil to‘ldi. Qariyb chorak asrlik o‘zaro hamkorlik aloqalari davrida xalqaro ekspeditsiya a’zolari Termizda salmoqli ishlarni amalga oshirmoqda. Shaharning qadimgi mudofaa tizimi shakllanishi va taraqqiyot bosqichlari atroflicha o‘rganilayotir. Shunga muvofiq, eski shahar bino va inshootlarida, Chingiztepa nomli ikkita ulkan qal’aning saroy majmuasida, buddaviylik ibodatxonalarida qazish va ilmiy-tadqiqot ishlari olib borilmoqda. Eski Termiz shahri aholisining alohida turar joy inshootlari, ayniqsa, Kushon davriga oid bino, o‘rta asrlar davri binolari va unga tutash mudofaa istehkomlari ham katta qiziqish uyg‘otmoqda.
O‘tgan yillarda xalqaro ekspeditsiyaning bir guruh a’zolari Surxon vohasi hududini o‘rganib, Boysun, Denov, Angor, Sariosiyo, Uzun tumanlarida 100 dan ortiq yangi arxeologik yodgorliklarni aniqladi, ro‘yxatga oldi. Angor tumanidagi “Tallimaron-1”, “Tallimaron-2”, Jarqo‘rg‘on tumanidagi “Jartepa” singari yodgorliklarning Kushon davriga oid noyob topilmalari hududning taraqqiyot bosqichlarini o‘rganishda muhim manba bo‘lib xizmat qilmoqda.
Xalqaro ekspeditsiya a’zolari tomonidan olib borilayotgan izlanishlar natijalari jahon miqyosida, ayniqsa, Yevropa davlatlarida targ‘ib qilinayotgani xorijda qadimiy Surxon vohasiga qiziqishni yanada oshirmoqda. Xususan, ikki mamlakat olimlari hamkorligida nashr etilayotgan “Arxeologiya xabarlari” ommabop jurnalining ikki soni bevosita Surxondaryoning qadimiy va o‘rta asrlar tarixi hamda madaniyatiga bag‘ishlandi. O‘zbekistonlik Sh.Pidayev, T.Annayev, fransiyalik P.Lerish, J.Fussman kabi arxeolog olimlar va ilmiy tadqiqotchilar hamkorligida eski Termiz yodgorligi hamda uning boy tarixiga bag‘ishlangan qiziqarli maqolalar chop etildi.
Izoh (0)