Фанлар академияси Яҳё Ғуломов номидаги археологик тадқиқотлар институти олимлари билан Франция илмий марказлари ва университетлари ҳамкорлигида амалга оширилаётган илмий лойиҳалар ўз самарасини бермоқда. Бу ҳақда ЎзА маълум қилди.
Мазкур лойиҳалар доирасида Шаҳрисабз шаҳри, Самарқанд, Бухоро, Сурхондарё вилоятларида турли даврларга оид археологик ёдгорликлар ўрганилиб, бу қадимий гўшаларнинг ҳали фанга номаълум қирралари кашф этилмоқда.
Сурхондарё вилоятида археологик тадқиқот ишлари олиб бораётган «Ўзбек-Француз-Бақтрия» илмий экспедицияси фаолиятига 24 йил тўлди. Қарийб чорак асрлик ўзаро ҳамкорлик алоқалари даврида халқаро экспедиция аъзолари Термизда салмоқли ишларни амалга оширмоқда. Шаҳарнинг қадимги мудофаа тизими шаклланиши ва тараққиёт босқичлари атрофлича ўрганилаётир. Шунга мувофиқ, эски шаҳар бино ва иншоотларида, Чингизтепа номли иккита улкан қалъанинг сарой мажмуасида, буддавийлик ибодатхоналарида қазиш ва илмий-тадқиқот ишлари олиб борилмоқда. Эски Термиз шаҳри аҳолисининг алоҳида турар жой иншоотлари, айниқса, Кушон даврига оид бино, ўрта асрлар даври бинолари ва унга туташ мудофаа истеҳкомлари ҳам катта қизиқиш уйғотмоқда.
Ўтган йилларда халқаро экспедициянинг бир гуруҳ аъзолари Сурхон воҳаси ҳудудини ўрганиб, Бойсун, Денов, Ангор, Сариосиё, Узун туманларида 100 дан ортиқ янги археологик ёдгорликларни аниқлади, рўйхатга олди. Ангор туманидаги «Таллимарон-1», «Таллимарон-2», Жарқўрғон туманидаги «Жартепа» сингари ёдгорликларнинг Кушон даврига оид ноёб топилмалари ҳудуднинг тараққиёт босқичларини ўрганишда муҳим манба бўлиб хизмат қилмоқда.
Халқаро экспедиция аъзолари томонидан олиб борилаётган изланишлар натижалари жаҳон миқёсида, айниқса, Европа давлатларида тарғиб қилинаётгани хорижда қадимий Сурхон воҳасига қизиқишни янада оширмоқда. Хусусан, икки мамлакат олимлари ҳамкорлигида нашр этилаётган «Археология хабарлари» оммабоп журналининг икки сони бевосита Сурхондарёнинг қадимий ва ўрта асрлар тарихи ҳамда маданиятига бағишланди. Ўзбекистонлик Ш.Пидаев, Т.Аннаев, франциялик П.Лериш, Ж.Фуссман каби археолог олимлар ва илмий тадқиқотчилар ҳамкорлигида эски Термиз ёдгорлиги ҳамда унинг бой тарихига бағишланган қизиқарли мақолалар чоп этилди.
Изоҳ (0)