Qirg‘iziston Respublikasi Issiqko‘l viloyatining Cho‘lponota shahrida Markaziy Osiyo davlatlari (Qirg‘iziston, Qozog‘iston, Tojikiston, O‘zbekiston) ichki ishlar vazirlarining birinchi kengaytirilgan qo‘shma yig‘ilishi o‘z yakuniga yetdi, deb xabar berdi IIV Jamoatchilik va ommaviy axborot vositalari bilan aloqalar boshqarmasi.
Mazkur formatdagi tadbir birinchi bor o‘tkazilishi. Xalqaro ahamiyat kasb etuvchi ushbu tadbir Qirg‘iziston Respublikasi Prezidenti Sooranbay Jeenbekov tomonidan Markaziy Osiyo davlatlari rahbarlarining Ostona shahridagi birinchi maslahat uchrashuvi davomida Markaziy Osiyo davlatlari xalqlarining manfaatlari yo‘lida mintaqaviy hamkorlikka yo‘naltirilgan, birodarlik va qo‘shnichilik aloqalarini yangilash va faollashtirish borasidagi qo‘yilgan topshiriqlari ijrosini ta’minlash maqsadida o‘tkazilmoqda.
Uchrashuvda Tojikiston Respublikasi IIV delegatsiyasi rahbari sifatida ichki ishlar vaziri militsiya general-polkovnigi Raximzoda Ramazon Xamro, Qozog‘iston Respublikasi IIV delegatsiyasi rahbari ichki ishlar vaziri politsiya general-polkovnigi Kasimov Kalmuxanbet Nurmuxanbetovich, O‘zbekiston Respublikasi IIV delegatsiyasi rahbari ichki ishlar vaziri general-mayor Bobojonov Po‘lat Razzoqovichlar ishtirok etishdi.
Shuningdek, yig‘ilishda Markaziy Osiyo davlatlari IIVlarining chegaradosh viloyatlar IIBBlari, IIBlari va departamentlari rahbarlari ham ishtirok etdi: (Chuy viloyati IIBB, Issiqko‘l, Talas, Osh, Jalolobod, Botken viloyat IIBlari, Qozog‘iston Respublikasi Olmaota va Jambul viloyatlari ichki ishlar departamenti, Tojikiston Respublikasi So‘g‘d viloyati IIB, O‘zbekiston Respublikasi Andijon, Namangan, Farg‘ona viloyat IIBlari rahbarlari).
Yig‘ilishda Qirg‘iziston Respublikasi ichki ishlar vaziri Kashkar Djunushaliyev so‘zga chiqib, “Avvalo, Sizga Qirg‘iziston, Qozog‘iston, Tojikiston, O‘zbekiston Respublikalari ichki ishlar vazirlari qo‘shma yig‘ilishini o‘tkazish yuzasidan qilingan tashabbusni qo‘llab quvvatlaganingiz uchun minnatdorchiligimni bildiraman. Markaziy Osiyo chegaradosh davlatlari formatidagi ushbu uchrashuv vazirliklarimizning mintaqada yanada chuqurroq hamkorlik qilishga intilishidan darakdir”, deb ta’kidladi.
Kashkar Djunushaliyev yana, davlatlar manfatlari chambar-chars bog‘liqligini, dolzarb masalalarni yechishda o‘zaro hamkorlik asosiga yondashish lozimligini, ushbu formatdagi uchrashuvlar bizga mintaqa davlatlarini bir xil tashvishga solayotgan jinoyatchilik olamidagi yangi tahdidlarni o‘z vaqtida aniqlash imkoniyatini berishini ham aytib o‘tdi.
Kompyuter texnologiyalari va jahon internet tarmog‘ining rivoji davrida aloqalarda “Kiber-ekstremizm” va“Kiber-terrorizm” xavflari tus olmoqda.
Asosan u internet tarmoqlarida targ‘ibot-tashviqot ko‘rinishlarida namoyon bo‘lib, o‘ylab topilgan og‘ir psixologik holatlar natijasida mablag‘laridan voz kechish, hamkorlarini yollash, teraktlar uyushtirish, psixologik tahdidlar, qo‘rqitish, diniy va boshqa ko‘rinishlarda bo‘ladi. Informatsion jamiyat esa, ushbu tahdidlardan himoyalanishga muhtojdir.
Kunning birinchi yarmida barcha yig‘ilish qatnashchilari 4 ishchi guruhiga bo‘linib, uyushgan jinoyatchilikka, ekstremizm va terrorizmning ko‘rinishlariga qarshi kurashish mexanizmlarini, shuningdek, internet tarmog‘i jinoyatchiligi, chegaradosh hududlar ichki ishlar organlarining jamoat tartibini va xavfsizligini ta’minlash borasidagi savollarini muhokama qildi.
Uchrashuv yakunida Markaziy Osiyo mamlakatlari IIVlarining qo‘shma bayoni imzolandi.
Bundan tashqari, uchrashuv jarayonida O‘zbekiston va Qirg‘iziston Respublikalari ichki ishlar vazirlari tomonidan uyushgan jinoyatchilikka qarshi kurashish, ekstremizm va terrorizmning ko‘rinishlariga qarshi kurashishda o‘zaro tajriba almashish, chegaradosh joylarda jamoat tartibini saqlash va jamoat xavfsizligini ta’minlash borasida qo‘shma reja imzolandi.
Ichki ishlar vazirliklari rahbarlari ishtirokidagi mazkur uchrashuv do‘stona, ishchan va ishonchli ruhda o‘tdi.
Izoh (0)