Facebook’ga uyushtirilgan kiberhujum 50 mln akkauntga ta’sir qildi. Foydalanuvchilarga qanchalik zarar yetkazilgani hozircha noma’lum

Facebook kompaniyasi ijtimoiy tarmoq kiberhujumga uchraganini ma’lum qildi. Meduza’ning yozishicha, hujum salkam 50 million akkauntga ta’sir qilgan.

Huquqbuzarlar “Bu foydalanuvchi sifatida ko‘rish” funksiyasi bilan bog‘liq nosozlikdan foydalangan; ular foydalanuvchiga har safar login va parolni qayta-qayta termasdan ijtimoiy tarmoqqa kirish imkonini beruvchi kirish kalitlarini o‘g‘irlashga muvaffaq bo‘lgan. Ushbu kalitlar yordamida xakerlar akkauntlar ustidan nazorat o‘rnatgan bo‘lishi mumkin.

Oxir-oqibat biror akkaunt o‘g‘irlanganmi-yo‘qmi, bundan Facebook hozircha bexabar. Xavfsizlik nuqtai nazaridan ijtimoiy tarmoq 90 million foydalanuvchining kirish kalitlarini almashtirib chiqdi; shu bois foydalanuvchilar 28 sentyabr, juma kuni login va parollarni qaytadan terishga majbur bo‘lgan. Facebook’ning bayonotia ko‘ra, parolni o‘zgartirish shart emas.

“Biz nosozlikni bartaraf etdik va yuz bergan holat yuzasidan huquq-tartibot organlariga murojaat qildik... Ushbu hujum ortida kim turganini va ular qayerdan turib hujum qilganini hozircha bilmaymiz”, — deyiladi ijtimoiy tarmoqning bayonotida.