Facebook’га уюштирилган киберҳужум 50 млн аккаунтга таъсир қилди. Фойдаланувчиларга қанчалик зарар етказилгани ҳозирча номаълум

Facebook компанияси ижтимоий тармоқ киберҳужумга учраганини маълум қилди. Meduza’нинг ёзишича, ҳужум салкам 50 миллион аккаунтга таъсир қилган.

Ҳуқуқбузарлар «Бу фойдаланувчи сифатида кўриш» функцияси билан боғлиқ носозликдан фойдаланган; улар фойдаланувчига ҳар сафар логин ва паролни қайта-қайта термасдан ижтимоий тармоққа кириш имконини берувчи кириш калитларини ўғирлашга муваффақ бўлган. Ушбу калитлар ёрдамида хакерлар аккаунтлар устидан назорат ўрнатган бўлиши мумкин.

Охир-оқибат бирор аккаунт ўғирланганми-йўқми, бундан Facebook ҳозирча бехабар. Хавфсизлик нуқтаи назаридан ижтимоий тармоқ 90 миллион фойдаланувчининг кириш калитларини алмаштириб чиқди; шу боис фойдаланувчилар 28 сентябр, жума куни логин ва паролларни қайтадан теришга мажбур бўлган. Facebook’нинг баёнотиа кўра, паролни ўзгартириш шарт эмас.

«Биз носозликни бартараф этдик ва юз берган ҳолат юзасидан ҳуқуқ-тартибот органларига мурожаат қилдик... Ушбу ҳужум ортида ким турганини ва улар қаердан туриб ҳужум қилганини ҳозирча билмаймиз», — дейилади ижтимоий тармоқнинг баёнотида.