Toshkentda Huawei Innovatsiyalar kuni o‘tkazildi. Bu haqda “Daryo”ga Innovatsion rivojlanish vazirligi matbuot xizmati xabar berdi.
Bu yilgi tadbir “Taraqqiyot strategiyasi” markazi bilan hamkorlikda tashkil etilib, “Markaziy Osiyodagi raqamli texnologiyalar uchun innovatsiyalar” mavzusiga bag‘ishlandi. Turli mamlakatlar hukumat xodimlari, sanoat va ilmiy doira vakillarining qariyb 200 nafari raqam raqamli infratuzilmaning iqtisodiy o‘sishga ta’siri, innovatsion loyihalar ishlab chiqarishni rag‘batlantirish va umumiy muvaffaqiyat ekotizimini yaratish kabi mavzularni muhokama qilish uchun yig‘ildilar.
Innovatsion rivojlanish vaziri Ibrohim Abdurahmonov tabrik so‘zi bilan chiqib, ishtirokchilarini qutlarkan, so‘nggi yillarda O‘zbekiston va Xitoy o‘rtasida barcha yo‘nalishlar, jumladan, ilm-fan va ta’lim sohasida ikki tomonlama hamkorlik rivojlanayotganligini ta’kidladi.
Vazirlik va Huawei kompaniyasi o‘rtasida OTM talabalari uchun videokonferensiya tarzida onlayn-kurslarni tashkil etish, innovatsion markazlardan birini yangi zamonaviy texnologiyalari bilan jihozlash, muayyan fermer xo‘jaligi bazasida “Aqlli qishloq xo‘jaligi” texnologiyasini joriy qilish va sinovdan o‘tkazish yuzasidan kelishib olinganini bildirdi.
Huawei Innovatsiyalar kuni Markaziy Osiyodagi raqamli ekotizimni barpo etishga jalb qilingan asosiy manfaatdor tomonlar o‘rtasida keng qamrovli muloqotni amalga oshirish uchun platformaga aylanib ulgurdi. Tadbir doirasida ishtirokchilar raqamli transformatsiya jarayonida hukumatlarning o‘rni va mavqei haqida fikr almashdi.
Ma’lumot uchun, 2013-yildan beri Huawei Innovatsiyalar kunlari London, Milan, Myunxen, Parij, Singapur, Sidney, Kuala-Lumpur, Dubay va San-Paulu shaharlarida bo‘lib o‘tdi. Huawei Markaziy Osiyo mintaqasi Turkiya, Ukraina, Belarus, Gruziya, Ozarbayjon, O‘zbekiston, Qozog‘iston, Qirg‘izston, Tojikiston, Turkmaniston va Mo‘g‘ulistonni qamrab oladi.
Izoh (0)