“ICTWEEK Uzbekistan – 2018” axborot-kommunikatsiya texnologiyalari haftaligi doirasida “O‘zekspomarkaz”da ilk bor “DIGITAL UZBEKISTAN” forumi tashkil etildi. Bu haqda O‘zA xabar berdi.
Qiziqarli taqdimotlar va dolzarb mavzular muhokamasi, IT-sohasidagi jahonga mashhur mutaxassis va olimlar bilan tajriba almashish imkoniyati taqdim etilgani forumni AKT haftaligining eng yorqin voqeliklardan biriga aylantirdi.
Bu yerda bir maydonchada O‘zbekiston, Shvetsiya, Gruziya, Rossiya, Qozog‘iston, Janubiy Koreya, Germaniya va Singapurdan axborotlashtirish va digital-transformatsiya sohasidagi yetakchi mutaxassislar jam bo‘ldi.
Forum dasturidan spikerlar chiqishi va sho‘’ba munozaralari o‘rin oldi. Spikerlar chiqishlarida o‘z mamlakati va kompaniyalarining digital-transformatsiya, avtomatlashtirilgan tizimlarni joriy etish hamda “Elektron hukumat” tizimini rivojlantirish sohasidagi tajribalari haqida ma’lumot berdi. O‘z navbatida, sho‘’ba munozaralari O‘zbekistonda axborot texnologiyalari sohasini rivojlantirishga yo‘naltirilgan strategik qaror va dasturlarni ishlab chiqishga xizmat qiladi.
Xalq ta’limi vaziri o‘rinbosari Sarvar Boboxo‘jayev o‘z ma’ruzasida mamlakatimiz xalq ta’limi tizimiga AKTni joriy etish bo‘yicha rejalar hamda natijalar haqida to‘xtalib o‘tdi. Xususan, Xalq ta’limi vazirligidan maslahatlar olish va takliflar berishga mo‘ljallangan yangi portal taqdimotini o‘tkazdi. Bundan tashqari, umumta’lim maktablari ta’lim tizimida foydalaniladigan barcha darslik va o‘quv qo‘llanmalar, mustaqil mashg‘ulotlar uchun videodars va materiallarning elektron nusxasini o‘z ichiga olgan yangi veb-resurs yaratilishi haqida ma’lumot berildi. Shuningdek, kelgusi yildan barcha o‘quv materiallarini aprobatsiya qilish tizimi joriy etiladi.
Forumning sho‘’ba munozaralaridan biri moliya sohasidagi raqamli transformatsiyaga bag‘ishlandi. Turli mamlakat mutaxassislari iqtisodiyotning raqamli transformatsiyasi trend va istiqbollari, bank sohasi, tezkor to‘lovlar, davlat xizmatlari uchun onlayn-to‘lovlar, moliya tarmog‘i transformatsiyasi sohasidagi bulutli yechim va ilg‘or texnologiyalarga bag‘ishlangan ma’ruzalarini taqdim etdi.
Izoh (0)