Turkiya Buyuk millat majlisi raisi Binali Yildirim Oliy Majlis Qonunchilik palatasi cpikeri Nurdinjon Ismoilov hamrohligida Buxoro viloyatiga tashrif buyurdi. Bu haqda O‘zA xabar berdi.
Mehmonlar dastlab Kogon tumanida joylashgan Bahouddin Naqshband me’moriy majmuasini ziyorat qildi. Mamlakatda buyuk ajdodlar xotirasini e’zozlash, ularning qabr-maqbaralarini tiklash va obodonlashtirish yuzasidan amalga oshirilgan ishlar Turkiya parlamenti delegatsiyasida katta taassurot qoldirdi.
Delegatsiya a’zolari majmua hududidagi Buxoro davlat badiiy me’morchilik muzey-qo‘riqxonasiga qarashli “Naqshbandiya tariqati” muzey-filialini ko‘zdan kechirdi, Mir Arab oliy madrasasi talabalari bilan suhbatlashdi. Shuningdek, mehmonlar Bahouddin Naqshbandning volidasi Bibi Orifa qabrini ham ziyorat qildi.
Buxoro shahridagi Minorai Kalon majmuasi, bu yerdagi mashhur Masjidi Kalon va Mir Arab madrasasi bilan tanishuv ham esda qolarli bo‘ldi. Poyi Kalon majmuasiga tashrif chog‘ida O‘zbekiston milliy simfonik orkestrining konsertoldi tayyorgarlik mashg‘uloti doirasida ijro etilgan ashulalar nafaqat turkiyalik mehmonlar, balki bu yerga tashrif buyurgan xorijiy sayyohlarga ham manzur bo‘ldi.
Mehmonlar Buxoro ipak gilam to‘qish korxonasida bo‘lib, hunarmandlikning bobomeros an’analarini davom ettirayotgan gilamdo‘zlar mehnati va ular tayyorlagan mahsulotlarni ko‘zdan kechirdi.
Izoh (0)