Туркия Буюк миллат мажлиси раиси Бинали Йилдирим Олий Мажлис Қонунчилик палатаси cпикери Нурдинжон Исмоилов ҳамроҳлигида Бухоро вилоятига ташриф буюрди. Бу ҳақда ЎзА хабар берди.
Меҳмонлар дастлаб Когон туманида жойлашган Баҳоуддин Нақшбанд меъморий мажмуасини зиёрат қилди. Мамлакатда буюк аждодлар хотирасини эъзозлаш, уларнинг қабр-мақбараларини тиклаш ва ободонлаштириш юзасидан амалга оширилган ишлар Туркия парламенти делегациясида катта таассурот қолдирди.
Делегация аъзолари мажмуа ҳудудидаги Бухоро давлат бадиий меъморчилик музей-қўриқхонасига қарашли «Нақшбандия тариқати» музей-филиалини кўздан кечирди, Мир Араб олий мадрасаси талабалари билан суҳбатлашди. Шунингдек, меҳмонлар Баҳоуддин Нақшбанднинг волидаси Биби Орифа қабрини ҳам зиёрат қилди.
Бухоро шаҳридаги Минораи Калон мажмуаси, бу ердаги машҳур Масжиди Калон ва Мир Араб мадрасаси билан танишув ҳам эсда қоларли бўлди. Пойи Калон мажмуасига ташриф чоғида Ўзбекистон миллий симфоник оркестрининг концертолди тайёргарлик машғулоти доирасида ижро этилган ашулалар нафақат туркиялик меҳмонлар, балки бу ерга ташриф буюрган хорижий сайёҳларга ҳам манзур бўлди.
Меҳмонлар Бухоро ипак гилам тўқиш корхонасида бўлиб, ҳунармандликнинг бобомерос анъаналарини давом эттираётган гиламдўзлар меҳнати ва улар тайёрлаган маҳсулотларни кўздан кечирди.
Изоҳ (0)