Britaniya sun’iy yo‘ldoshi kosmik chiqindini to‘r yordamida tutishni o‘rgandi

Buyuk Britaniyaga tegishli sun’iy yo‘ldosh to‘r yordamida kosmik chiqindini tutish bo‘yicha tajriba o‘tkazdi. Bu haqda “RIA Novosti” xabar berdi.

Xabar berilishicha, sun’iy yo‘ldosh 17-sentabr kuni o‘zining birinchi sinovini boshlagan va kosmosga oyoq kiyimi qutisi kattaligidagi jismni qo‘yib yuborgan. Keyin yetti metr masofadan yo’ldosh kosmik chiqindi sifatida olingan bu obyektni ushlab olish uchun kengligi besh metr bo‘lgan to‘rni ochgan. Agar to‘r haqiqiy kosmik chiqindini ushlash uchun ishlatilganda, yo‘ldoah uni pastroq orbitaga olib tushgan bo‘lardi, shundan so‘ng chiqindi atmosferaga kirish chog‘ida yonib ketgan bo‘lar edi.

Ta’kidlanishicha, obyekt aylanib ketgan, mutaxassislar esa buni kutmagan edi. Ularning so‘zlariga ko‘ra, to‘r yirik chiqindilarni, masalan, ishdan chiqqan sun’iy yo‘ldoshlarni ushlash uchun foydalaniladi.

Loyiha rahbarining qayd etishicha, kosmosda chiqindilarni tozalash chog‘dagi eng qiyin vaziyatlardan biri ikki katta jismning bir-biriga to‘qnashib ketishi hisoblanadi. To‘qnashuv chiqindilar harakati tezligining oshib ketishiga olib keladi. To‘qnashuvlar zanjiri oqibatida harbiy va kommunikatsion yo‘ldoshlar zararlanishi mumkin.

Xabar berilishicha, Yer orbitasida sun’iy yo‘ldoshni buzish uchun yetarli tezlikda harakatlanayotgan va kattaligi tennis koptogiga teng bo‘lgan taxminan 500 mingta jism mavjud.