Kecha, 11-sentabr sanasida futbol bo‘yicha Ektor Kuper boshchiligidagi O‘zbekiston terma jamoasi Eron termasiga qarshi o‘rtoqlik o‘yinida maydonga tushib, 0:1 hisobida imkoniyatni boy berdi. Uchrashuvdan so‘ng eronliklar bosh murabbiyi matbuot anjumanida qatnashdi.
Bugun juda ham chiroyli o‘yin bo‘ldi. Ikkala jamoa ham yaxshi o‘yin ko‘rsatdi. Bugungi o‘rtoqlik uchrashuvi juda yaxshi o‘tdi deb ayta olaman. O‘yindagi natija esa muhim emasdi. Shunga qaramay o‘yin juda ham qiziqarli bo‘ldi. Bu o‘yin Osiyo kubogiga tayyorgarlik vazifasini o‘tadi. O‘zbekiston doim Eron bilan yaxshi o‘yin ko‘rsatib keladi. Masalan, Jahon Chempionatidan oldin O‘zbekiston Tehronga kelib o‘rtoqlik uchrashuvi o‘tkazishgandi.— Sizning qo‘l ostingizda Eron terma jamoasi yaxshi o‘yin ko‘rsatib kelmoqda. Kelajagingiz haqida nima deya olasiz?
— Osiyo Kubogida chempion bo‘lish juda og‘ir. Sababi Yaponiya, Janubiy Koreya, Avstraliya va O‘zbekiston ham buni istaydi. Ammo chempion bo‘lish juda qiyin. Kelajagim haqida gapiradigan bo‘lsam hozircha shartnomaga qo‘l qo‘yganim yo‘q va kutayapman. Bu bizning ichki ishimiz ekanligini tushuningizni so‘rardim.
— Siz anchadan buyon Eronda ishlayapsiz. Qosimov, Abramov, Babayan, Kapadze va bugun Kuper jamoasini mag‘lub etdingiz. Qaysi o‘yinda O‘zbekiston kuchliroq o‘ynaganini aytib bera olasizmi?
— Ektor Kuper bir oy oldin terma jamoani qabul qilib oldi. Unga ishonishingiz kerak. Bugun ham jamoangiz yaxshi o‘ynadi, sekin-asta O‘zbekistonning o‘yini kuchayib borishiga shubha yo‘q.
— O‘yin davomida siz asosan qarshi hujumda gol urish va shu natijani saqlab qolishga harakat qildingizmi?
— Bugungi o‘yin shunchaki tayyorgarlik vazifasini o‘tab berdi. Jahon Chempionatidan oldin bizning taktikamiz boshqacha edi, endi taktika o‘zgardi. Sababi Jahon Chempionati va Osiyo kubogi boshqa-boshqa musobaqalar. Bugun ko‘plab yosh futbolchilarga imkon berdik. Chiziqlar o‘rtasidagi bog‘liqliklarni tekshirib ko‘rdik.
— May oyida Tehronda O‘zbekiston bilan o‘rtoqlik uchrashuvi o‘tkazilgandi. O‘sha o‘yin bilan bugungi o‘yin o‘rtasida qanday farqni sezdingiz?
— Eron terma jamoasi bosh murabbiyi sifatida bir nima deyishim mumkin: O‘zbekiston terma jamoasi safida kuchli futbolchilar ko‘p. Janubiy Koreyadagi Son Xyon Min, bizdagi Sardor Azmun va O‘zbekistondagi Odil Ahmedov Osiyoning top o‘yinchilari hisoblanadi.
Izoh (0)