Farg‘onada professional boks bo‘yicha O‘zbekiston chempionatining final bahslari o‘tkazildi. Bu haqda “Daryo” muxbiri Azizjon Ermatov xabar berdi.
Final janglarida chempionatning viloyat va mintaqaviy bosqichlarida g‘olib bo‘lgan charm qo‘lqop ustalari 5 vazn toifasida kuch sinashdi.
53 kg vazn toifasida bokschi Olim Nazarov navoiylik Nurjan Serikovni mag‘lub etib, chempionlik kamarini qo‘lga kiritdi. 63 kg vazn toifasidagi sportchilar bahsida xorazmlik Abdurasul Ismoilov Navoiy viloyati vakili Ulug‘bek Do‘stmurodovni 3-raundda texnik nokautga uchratdi. 66 kg vazn toifasida Toshkent shahri vakili Muhammadsalim Sotiboldiyev, 69 kg vazn toifasida farg‘onalik Akmalxon Jamolxonov mamlakat chempioni bo‘ldi.
76 kg vazn toifasidagi final jangida tezkor nokaut qayd etildi. Farg‘ona viloyati sharafini himoya qilgan Muslimbek Olimov xorazmlik Rajapboy Otanazarovni birinchi raundning 30-soniyasida nokautga uchratdi.
6 raunddan iborat final janglarida g‘olib bo‘lgan bokschilarga 8 million, ikkinchi o‘rin sohiblariga 4 million, uchinchi o‘rinni qo‘lga kiritgan sportchilarga esa 2 million so‘mdan pul mukofotlari topshirildi.
Qolgan 5 vazn toifasida final janglari 15-sentyabr kuni Samarqand viloyatida o‘tkaziladi.
Izoh (0)