O‘zbekistonlik talabalarning birinchi guruhi Moskva muhandislik-fizika instituti Milliy yadro tadqiqoti universitetida (MMFI MYATU) bakalavriat va magistrlik dasturlari bo‘yicha, “Yadro fizikasi va texnologiyasi” mutaxassisligida o‘qishni boshladi. Bu haqda “Daryo”ga “Rosatom” korporatsiyasi matbuot xizmati ma’lum qildi.
Talabalarni tayyorlash O‘zbekiston Respublikasi va Rossiya Federatsiyasi o‘rtasida o‘tgan yilning oxirida imzolangan tinchlik maqsadlarida atom energiyasidan foydalanish sohasida hamkorlik to‘g‘risidagi hukumatlararo bitimga muvofiq amalga oshiriladi.
Nomzodlar tanlovi O‘zbekiston Respublikasi Fanlar akademiyasi vakillari tomonidan 2018-yil mart oyida ikki bosqichda tashkil etildi. Ta’lim olish uchun arizalar ryespublikaning barcha viloyatlaridan, 326 nafar da’vogardan kelib tushdi. Birinchi bosqichda bakalavriat dasturi bo‘yicha o‘qishga da’vogarlar fizika, matematika va rus tilidan yozma imtihon topshirdi, magistraturaga kiruvchilar esa mamlakatning to‘rt shahari — Andijon, Nukus, Samarqand va Toshkent shaharlarida og‘zaki imtihon topshirdi.
Yakuniy tanlovda ishtirok etish uchun birinchi tur natijalariga ko‘ra komissiya 81 nafar da’vogarni tanladi. Toshkentdagi Milliy universitetda o‘tkazilgan tanlovning yakuniy bosqichida MMFI o‘qituvchilari 15 nafar g‘olibni aniqladi, ulardan 12 nafari bakalavriat, 3 nafari esa magistraturada o‘qish uchun tavsiya etildi.
MMFI MYATUda o‘qish davomida o‘zbekistonlik talabalarga Rossiya atom sanoatining faol obyektlarida amaliy mashg‘ulotlar o‘tish imkoniyati beriladi.
“O‘zbekiston yadro sanoatini yaratish va rivojlantirish uchun yuqori malakali yadro mutaxassislar kerak. ‘Rosatom‘ davlat korporatsiyasi kelajakdagi AESda ishlaydigan milliy kadrlarni tayyorlashni har tomonlama qo‘llab-quvvatlaydi. Talabalar Rossiyaning yetakchi universitetida oladigan ta’lim haqli ravishda dunyodagi eng yaxshi ta’limlardan biri hisoblanadi. Bu MMFIning ko‘plab mustaqil xalqaro tadqiqotlardagi yuqori reytinglari bilan tasdiqlangan. MMFIda o‘qishni tugatgan o‘zbekistonlik talabalar o‘z vatanlariga yadro texnologiyalari sohasidagi yuqori malakali mutaxassislar bo‘lib qaytadi”, — deydi professor Mixail Kremkov.
Ma’lumot uchun, MMFI Milliy yadro tadqiqoti universiteti “Rosatom” davlat korporatsiyasining tayanch o‘quv yurti bo‘lib, 1942-yilda tashkil etilgan. Rossiyaning eng mashhur va obro‘li texnik universitetlaridan biri, atom energetikasi, yadroviy fizika va tehnologiyalar sohasidagi yetakchi ta’lim muassasasi hisoblanadi. O‘quv jarayoni ikki asosiy markaz — Moskva va Obninskda amalga oshiriladi.
Izoh (0)