Ўзбекистонлик талабаларнинг биринчи гуруҳи Москва муҳандислик-физика институти Миллий ядро тадқиқоти университетида (ММФИ МЯТУ) бакалавриат ва магистрлик дастурлари бўйича, «Ядро физикаси ва технологияси» мутахассислигида ўқишни бошлади. Бу ҳақда «Дарё»га «Росатом» корпорацияси матбуот хизмати маълум қилди.
Талабаларни тайёрлаш Ўзбекистон Республикаси ва Россия Федерацияси ўртасида ўтган йилнинг охирида имзоланган тинчлик мақсадларида атом энергиясидан фойдаланиш соҳасида ҳамкорлик тўғрисидаги ҳукуматлараро битимга мувофиқ амалга оширилади.
Номзодлар танлови Ўзбекистон Республикаси Фанлар академияси вакиллари томонидан 2018 йил март ойида икки босқичда ташкил этилди. Таълим олиш учун аризалар республиканинг барча вилоятларидан, 326 нафар даъвогардан келиб тушди. Биринчи босқичда бакалавриат дастури бўйича ўқишга даъвогарлар физика, математика ва рус тилидан ёзма имтиҳон топширди, магистратурага кирувчилар эса мамлакатнинг тўрт шаҳари — Андижон, Нукус, Самарқанд ва Тошкент шаҳарларида оғзаки имтиҳон топширди.
Якуний танловда иштирок этиш учун биринчи тур натижаларига кўра комиссия 81 нафар даъвогарни танлади. Тошкентдаги Миллий университетда ўтказилган танловнинг якуний босқичида ММФИ ўқитувчилари 15 нафар ғолибни аниқлади, улардан 12 нафари бакалавриат, 3 нафари эса магистратурада ўқиш учун тавсия этилди.
ММФИ МЯТУда ўқиш давомида ўзбекистонлик талабаларга Россия атом саноатининг фаол объектларида амалий машғулотлар ўтиш имконияти берилади.
«Ўзбекистон ядро саноатини яратиш ва ривожлантириш учун юқори малакали ядро мутахассислар керак. ‘Росатом‘ давлат корпорацияси келажакдаги АЭСда ишлайдиган миллий кадрларни тайёрлашни ҳар томонлама қўллаб-қувватлайди. Талабалар Россиянинг етакчи университетида оладиган таълим ҳақли равишда дунёдаги энг яхши таълимлардан бири ҳисобланади. Бу ММФИнинг кўплаб мустақил халқаро тадқиқотлардаги юқори рейтинглари билан тасдиқланган. ММФИда ўқишни тугатган ўзбекистонлик талабалар ўз ватанларига ядро технологиялари соҳасидаги юқори малакали мутахассислар бўлиб қайтади», — дейди профессор Михаил Кремков.
Маълумот учун, ММФИ Миллий ядро тадқиқоти университети «Росатом» давлат корпорациясининг таянч ўқув юрти бўлиб, 1942 йилда ташкил этилган. Россиянинг энг машҳур ва обрўли техник университетларидан бири, атом энергетикаси, ядровий физика ва теҳнологиялар соҳасидаги етакчи таълим муассасаси ҳисобланади. Ўқув жараёни икки асосий марказ — Москва ва Обнинскда амалга оширилади.
Изоҳ (0)